काठमाडौं । प्रधानमन्त्री बालेन्द्र शाहले रसुवामा भीषण बाढी आएपछि सरकारले उद्धार तथा राहत कार्यलाई तीव्र बनाएको बताएका छन्। शाहले बाढी प्रभावित क्षेत्रमा नेपाली सेना, सशस्त्र प्रहरी बल र नेपाल प्रहरी परिचालन गरिएको बताए ।

उनका अनुसार प्रभावित क्षेत्रमा सुरक्षाकर्मी परिचालन गर्नुका साथै अन्य जिल्लाबाट समेत थप जनशक्ति पठाइएको छ। उद्धार र राहतका लागि आवश्यक सबै संयन्त्रलाई सक्रिय बनाइएको उनको भनाइ छ।

विपद् व्यवस्थापन प्राधिकरणलाई पनि सक्रिय बनाइएको छ। प्रभावित क्षेत्रमा मेडिकल टिम, एम्बुलेन्स र थप स्वास्थ्यकर्मी पठाउने तयारी भइरहेको छ। उद्धार तथा राहतमा नेपाल स्काउट र रेडक्रसलगायतका संस्थासँग समेत समन्वय भइरहेको प्रधानमन्त्री शाहले बताएका छन्।

बाढीको जोखिममा रहेका तल्लो तटीय क्षेत्रका बासिन्दालाई तत्काल सुरक्षित स्थानमा सार्न सम्बन्धित प्रमुख जिल्ला अधिकारीलाई निर्देशन दिइएको छ। जोखिममा रहेका नागरिकलाई एसएमएस र फोनमार्फत जानकारी गराउँदै सुरक्षित स्थानतर्फ जान आग्रह गरिएको छ।

सम्भावित उद्धारका लागि सबै हेलिकप्टरलाई स्ट्यान्डबाइमा राख्न निर्देशन दिइएको प्रधानमन्त्री शाहले बताएका छन्। निजी हेलिकप्टर कम्पनीलाई समेत उद्धारका लागि तयारी अवस्थामा रहन जानकारी गराइएको छ।

बाढीबाट उत्पन्न परिस्थितिबारे थप निर्णय लिन उच्चस्तरीय बैठकसमेत बोलाइएको प्रधानमन्त्री शाहले जानकारी दिएका छन्।

उनले प्रभावित क्षेत्रका नागरिकलाई सुरक्षित स्थानमा बस्न आग्रह गरेका छन्। आफन्तसँग सम्पर्क हुन नसकेको अवस्थामा उद्धार तथा राहतसम्बन्धी आधिकारिक सूचनाको प्रतीक्षा गर्न पनि उनले आग्रह गरेका छन्।

बाढी तथा उद्धारसम्बन्धी थप जानकारीका लागि १२३४ नम्बरमा सम्पर्क गर्न सकिने जनाइएको छ।