काठमाडौं । रसुवाको टिमुरेस्थित रसुवा भन्सार कार्यालयमा कार्यरत १४ जना कर्मचारी भोटेकोसी नदीमा आएको बाढीपछि सम्पर्कविहीन भएका छन्।

आज बिहान भोटेकोसी नदीमा आएको बाढीपछि भन्सार कार्यालयमा कार्यरत कर्मचारीहरूसँग सम्पर्क हुन नसकेको हो। अर्थमन्त्री डा. स्वर्णिम वाग्लेको सचिवालयका अनुसार सम्पर्कविहीन हुनेमा ११ जना स्थायी र तीन जना करारका कर्मचारी रहेका छन्।

रसुवा भन्सार कार्यालयका प्रमुख भन्सार प्रशासक राजेन्द्र ढुङ्गानासहित २५ जना कर्मचारी भने सम्पर्कमा आएका छन्। कार्यालयमा कार्यरत अन्य कर्मचारीसँग पनि सम्पर्क स्थापित गर्ने प्रयास भइरहेको जनाइएको छ।

भन्सार कार्यालयमा चार जना करार तथा ज्यालादारी कर्मचारी कार्यरत रहेकामा एक जना भने सम्पर्कमा आएका छन्। बाढीका कारण टिमुरे क्षेत्रमा समेत ठूलो जोखिम उत्पन्न भएकाले कर्मचारीहरूको अवस्थाबारे थप विवरण संकलन भइरहेको छ।

भोटेकोसीमा आएको बाढीका कारण रसुवाको टिमुरे तथा आसपासका क्षेत्रमा ठूलो क्षति पुगेको छ। बाढीले विभिन्न सरकारी तथा निजी संरचनामा क्षति पुर्‍याउनुका साथै नदी आसपासका क्षेत्रमा बसोबास गर्ने नागरिक र कार्यरत कर्मचारीसमेत प्रभावित भएका छन्।