काठमाडौं । सरकारले बाढी प्रभावित रसुवा, नुवाकोट र धादिङलाई विपत् संकटग्रस्त क्षेत्र घोषणा गरेको छ। मन्त्रिपरिषद्को आकस्मिक बैठकले तीनवटै जिल्लालाई तीन महिनाका लागि विपत् संकटग्रस्त क्षेत्र घोषणा गर्ने निर्णय गरेको हो।

मन्त्रिपरिषद्को आकस्मिक बैठकले बाढीबाट प्रभावित तीन जिल्लामा उद्धार, राहत तथा पुनःस्थापनासहित आवश्यक कामलाई तीव्रता दिने निर्णय गरेको एक मन्त्रीले जानकारी दिए।

बाढीका कारण रसुवासहित नुवाकोट र धादिङका विभिन्न क्षेत्रमा जनधनको क्षति भएको तथा नदी तटीय क्षेत्रमा जोखिम बढेको भन्दै सरकारले प्रभावित क्षेत्रलाई प्राथमिकतामा राखेर काम अघि बढाउने निर्णय गरेको हो।

बैठकले तीनवटै जिल्लामा आवश्यक पर्ने कामको पहिचान गरी तत्काल कार्यान्वयनमा लैजान सबै मन्त्रीलाई आ–आफ्नो मन्त्रालयको जिम्मेवारीअनुसार फिल्डमै खटिन निर्देशनसमेत दिएको छ।

सरकारले सम्बन्धित मन्त्रालय र निकायबीच समन्वय गरी बाढी प्रभावित क्षेत्रमा उद्धार, राहत तथा आवश्यक पूर्वाधार व्यवस्थापनको काम अघि बढाउने तयारी गरेको छ। साथै, प्रभावित नागरिकको तत्काल उद्धार र राहतलाई प्राथमिकतामा राखेर आवश्यक स्रोत तथा जनशक्ति परिचालन गर्ने तयारी गरिएको छ।

मन्त्रिपरिषद्को आकस्मिक बैठक बाढीबाट उत्पन्न पछिल्लो अवस्थाबारे छलफल गर्न बसेको थियो। बैठकले प्रभावित तीन जिल्लामा सरकारी संयन्त्रलाई थप सक्रिय बनाउँदै विपद् व्यवस्थापनका कामलाई प्रभावकारी रूपमा अघि बढाउने निर्णय गरेको हो।