काठमाडौं । नेपाली कांग्रेसका नेता तथा प्रतिनिधिसभा सदस्य अर्जुननरसिंह केसीले रसुवाको भोटेकोशीमा आएको बाढीबाट प्रभावित नागरिकको उद्धारलाई पहिलो प्राथमिकतामा राख्न सरकारसँग आग्रह गरेका छन्।

बुधबार प्रतिनिधिसभा बैठकमा बोल्दै केसीले विपद्को गम्भीर अवस्थालाई ध्यानमा राख्दै अहिले राज्यको सम्पूर्ण ध्यान उद्धारमा केन्द्रित हुनुपर्ने बताए।

‘सबैभन्दा अहिले उद्धारको क्षेत्रलाई केन्द्रित गर्नुपर्ने छ । त्यसपछि राज्यको दायित्व भनेको राहतको हो,’ उनले भने।

उनले बाढीको जोखिममा रहेका नागरिकलाई तत्काल सुरक्षित स्थानमा सार्न र उद्धार कार्यलाई तीव्रता दिन आग्रह गरे। उद्धारपछि प्रभावितलाई राहत र पुनःस्थापनामा राज्यले प्रभावकारी भूमिका खेल्नुपर्ने उनको भनाइ थियो।

भोटेकोशी बाढीका कारण रसुवासहित आसपासका जिल्लामा ठूलो जनधनको क्षति भएपछि प्रतिनिधिसभामा समेत विपद्को अवस्थाबारे छलफल भइरहेको छ।