काठमाडौं । जय नेपाल पार्टीका सचिवालय प्रमुख सगुन सुन्दर लावतीले बाराको सिमरामा तीन वर्षीया बालिकाको बलात्कारपछि हत्या भएको घटनाप्रति गम्भीर आपत्ति जनाउँदै दोषीलाई कडा कानुनी कारबाही गर्न माग गरेका छन्।

एक प्रेस विज्ञप्ति जारी गर्दै लावतीले घटनालाई अमानवीय, क्रुर र शर्मनाक भन्दै दोषीमाथि शीघ्र कानुनी अनुसन्धान गरी हदैसम्मको सजाय दिन सरकारसँग माग गरेका हुन्।

लावतीले आफ्नै घर तथा समाजमा समेत बालबालिका असुरक्षित रहने अवस्था गम्भीर चिन्ताको विषय बनेको बताएका छन्। उक्त घटनाले नागरिक सुरक्षाका सवालमा राज्य र प्रशासनमा विद्यमान कमीकमजोरीसमेत उजागर गरेको उनको भनाइ छ।

उनले घटनाको जिम्मेवारपूर्ण र प्रभावकारी कानुनी अनुसन्धान शीघ्र सम्पन्न गरी घटनामा संलग्न दोषीलाई कानुनअनुसार कडा सजाय दिलाउन सरकारको गम्भीर ध्यानाकर्षण गराएका छन्।

न्यायको सर्वव्यापी मान्यताअनुसार पीडित पक्षलाई यथाशीघ्र न्याय दिलाउनुपर्नेमा जोड दिँदै उनले भविष्यमा यस्ता जघन्य अपराध दोहोरिन नदिन दोषीलाई कानुनबमोजिम कडाभन्दा कडा सजाय दिनुपर्ने माग गरेका छन्।

बालबालिकाको सुरक्षा राज्यको प्राथमिक दायित्व भएको भन्दै उनले यस्ता घटनाको निष्पक्ष अनुसन्धान, प्रभावकारी कानुनी कारबाही र नागरिक सुरक्षाको प्रत्याभूति सुनिश्चित गर्न सरकारसँग आग्रह गरेका छन्।

सगुन सुन्दर लावतीले भदौ ९ गते जारी गरेको प्रेस विज्ञप्तिमा उक्त धारणा सार्वजनिक गरेका हुन्। लावती सचिवालय प्रमुखका रूपमा उल्लेख गरिएको छ।