काठमाडौं। रसुवा र चीनको केरुङ क्षेत्रमा बाढीपहिरोले ठूलो क्षति पुर्‍याएपछि चीनले पनि घटनाप्रति उच्च तहमा चासो देखाएको छ ।

चिनियाँ राष्ट्रपति सी चिनफिङ र प्रधानमन्त्री ली छ्याङले विपद्पछि बेपत्ता नागरिकको खोजी, उद्धार तथा प्रभावितलाई सुरक्षित स्थानमा स्थानान्तरण गर्न सम्बन्धित निकायलाई निर्देशन दिएका छन् ।

चिनियाँ समाचार संस्था सिन्ह्वाका अनुसार अगस्ट २६ को बिहान करिब १०ः३० बजे सिचाङ (तिब्बत)को शिगात्से सहरअन्तर्गत केरुङ काउन्टीको केरुङ बन्दरगाह क्षेत्रमा नेपालतर्फ पहिरो गएको थियो । त्यसपछि आएको बाढीले नेपालतर्फको रसुवा क्षेत्रमा समेत ठूलो क्षति पुर्‍याएको हो ।

घटनालाई गम्भीरतापूर्वक लिँदै राष्ट्रपति सीले बेपत्ता व्यक्तिको खोजी तथा उद्धारलाई पहिलो प्राथमिकतामा राख्न निर्देशन दिएका छन् । जोखिममा रहेका नागरिकलाई तत्काल सुरक्षित स्थानमा सार्न, घाइतेको उपचार गर्न तथा मानवीय क्षति न्यूनीकरणका लागि उपलब्ध सबै उपाय परिचालन गर्न उनले भनेका छन् ।

सीले विपद्को निरन्तर निगरानी र पूर्वसूचना प्रणालीलाई थप प्रभावकारी बनाउन पनि निर्देशन दिएका छन् । उद्धार कार्य वैज्ञानिक ढंगले सञ्चालन गर्न तथा बाढीपहिरोबाट थप क्षति हुन नदिन सम्भावित जोखिम क्षेत्रको पहिचान र आवश्यक सावधानी अपनाउन उनले सम्बन्धित निकायलाई आग्रह गरेका छन् ।

चिनियाँ राष्ट्रपति सीले चीन अहिले बाढी नियन्त्रणको महत्वपूर्ण चरणमा रहेको उल्लेख गर्दै बाढी तथा आँधीबेहरीको जोखिम न्यूनीकरणका उपाय प्रभावकारी रूपमा कार्यान्वयन गर्न सबै क्षेत्र र सम्बन्धित निकायलाई निर्देशन दिएका छन् । सम्भावित लुकेका जोखिमको पहिचान गरी समयमै न्यूनीकरण गर्न तथा ठूला विपद् र दुर्घटना रोक्न विशेष ध्यान दिनुपर्ने उनको भनाइ छ ।

चिनियाँ प्रधानमन्त्री ली छ्याङले केरुङ क्षेत्रमा भएको बाढीपहिरोपछि बेपत्ता तथा प्रभावित नागरिकको संख्या तत्काल यकिन गर्न निर्देशन दिएका छन् ।

उनले खोज तथा उद्धारका लागि आवश्यक जनशक्ति र स्रोतसाधन परिचालन गर्न तथा जोखिममा रहेका मानिसलाई तत्काल र व्यवस्थित रूपमा सुरक्षित स्थानमा सार्न निर्देशन दिएका छन् । उद्धारका क्रममा वैज्ञानिक विधि अपनाउन र उद्धार टोलीको सुरक्षालाई समेत ध्यान दिनुपर्नेमा उनले जोड दिएका छन् ।

प्रधानमन्त्री लीले चिनियाँ विदेश मन्त्रालयलाई नेपालसँगको सञ्चार तथा समन्वय थप बलियो बनाउन र घटनाबारे आवश्यक जानकारी तत्काल आदानप्रदान गर्न निर्देशन दिएका छन् । नेपालमा समेत बाढीपहिरोबाट ठूलो क्षति भएको अवस्थामा दुवै पक्षबीच समन्वय गरी उद्धार तथा विपद् व्यवस्थापनका काम अघि बढाउनुपर्ने उनको भनाइ छ ।

चीनमा बाढीको मुख्य मौसम चलिरहेको उल्लेख गर्दै लीले राज्य बाढी नियन्त्रण तथा खडेरी राहत मुख्यालयलगायत सम्बन्धित निकायलाई विभिन्न क्षेत्रमा रहेका सम्भावित विपद् जोखिमको व्यापक अध्ययन गर्न निर्देशन दिएका छन् । पूर्वसूचना प्रणाली बलियो बनाउँदै जोखिम न्यूनीकरणका उपाय प्रभावकारी रूपमा लागू गर्न पनि उनले जोड दिएका छन् ।

रसुवाको भोटेकोशीमा आएको भीषण बाढीका कारण टिमुरे, स्याफ्रुबेँसीलगायत क्षेत्रमा ठूलो क्षति भएको छ । बाढीले बस्ती, सडक, पुल तथा सरकारी कार्यालयसँगै जलविद्युत् र प्रसारण संरचनामा समेत क्षति पुर्‍याएको प्रारम्भिक विवरण आएको छ ।

बाढीको बहाव भोटेकोशी हुँदै त्रिशूली नदीतर्फ बढेकाले रसुवा, नुवाकोट, धादिङ हुँदै चितवनसम्मका तल्लो तटीय क्षेत्रमा समेत जोखिम बढेको छ । नदी थुनिएको स्थानमा बनेको ताल पूर्ण रूपमा नखुलेको सूचनापछि भोटेकोशी र त्रिशूली नदी आसपासका नागरिकलाई थप सतर्क रहन आग्रह गरिएको छ ।

नेपालमा उद्धार, राहत तथा पुनःस्थापनाका लागि सुरक्षा निकायसहित विभिन्न सरकारी संयन्त्र परिचालन भइरहेका बेला चीनको उच्च तहबाट समेत खोज तथा उद्धार र जोखिम न्यूनीकरणलाई प्राथमिकता दिन निर्देशन आउनुलाई घटनाको गम्भीरताका रूपमा हेरिएको छ ।