काठमाडौं । सभामुख डोलप्रसाद अर्यालले रसुवाको भोटेकोशी नदीमा आएको विनाशकारी बाढीबाट भएको ठूलो धनजनको क्षतिप्रति दुःख व्यक्त गर्दै तत्काल उद्धार र राहतमा जुट्न सरकारको गम्भीर ध्यानाकर्षण गराएका छन् ।

प्रतिनिधिसभाको बुधबारको बैठकमा बोल्दै सभामुख अर्यालले बाढीमा घाइते भएकाहरूको तत्काल उद्धार, सम्पर्कविहीन तथा बेपत्ता नागरिकको खोजी र पीडित तथा विस्थापित परिवारलाई राहत उपलब्ध गराउन राज्यका सबै संयन्त्र परिचालन गर्न आग्रह गरे ।

‘यस दुःखद घडीमा राज्यका सम्पूर्ण संयन्त्र नै उद्धार, राहत र प्रभावित नागरिकको सहयोगमा जुट्नुपर्ने अवस्था रहेको छ,’ उनले भने, ‘बाढी प्रभावित क्षेत्रमा आवश्यक समन्वय र उद्धार कार्यलाई तीव्रता दिन म नेपाल सरकारलाई निर्देशन दिन्छु।’

सभामुख अर्यालले सरकारका निकायसँगै निजी क्षेत्र, गैरसरकारी संस्था र नागरिक समाजलाई समेत विपद्को यो घडीमा एकजुट भएर उद्धार तथा राहतमा सहयोग गर्न आह्वान गरे ।

भोटेकोशी बाढीका कारण देशका विभिन्न क्षेत्रमा ठूलो क्षति भएपछि संसद्मा समेत शोकको वातावरण बनेको भन्दै सभामुखले निर्धारित अन्य कार्यसूची थाती राखेर बैठक स्थगित गरेका छन् ।

प्रतिनिधिसभाको अर्को बैठक बिहीबार दिउँसो १ बजे बस्ने तय गरिएको छ ।

बैठकमा सरकारका तर्फबाट परराष्ट्रमन्त्री शिशिर खनालले भोटेकोशी बाढीको कारण तथा हालसम्म भएको क्षतिबारे सदनलाई जानकारी गराएका थिए ।