काठमाडौं। दुई महिनाअघि मात्रै क्यान्सरका कारण श्रीमान् गुमाएकी मानकुमारी खत्रीको जीवनमा अर्को बज्रपात परेको छ।

श्रीमानको मृत्युको पीडा भुल्न नपाउँदै उनको सहारा बनेका छोरा विजय खत्री पनि भोटेकोशीको भीषण बाढीपछि सम्पर्कविहीन भएका छन्।

दोलखाको जिरी नगरपालिका–७ का ३० वर्षीय विजय बुधबार बिहानदेखि सम्पर्कविहीन छन्। उनी कैलाश मानसरोवर जाने भारतीय तीर्थयात्रीको टोली लिएर मंगलबार रसुवा पुगेका थिए।

बुधबार बिहान करिब साढे ८ बजेसम्म उनी सम्पर्कमै थिए। अरनिको यातायात प्रालिका सञ्चालक टंकसँग उनले फोनमा कुराकानी गरेका थिए। सडक हिलाम्मे भएकाले केही सुकेपछि मात्रै हिँड्न टंकले उनलाई सुझाएका थिए। विजयले पनि ‘हुन्छ’ भनेका थिए।

त्यसको केही समयपछि भने उनको मोबाइलमा सम्पर्क हुन छाड्यो। बिहान करिब ९ बजेदेखि विजय सम्पर्कविहीन छन्।

उनी रसुवाको घट्टेखोला क्षेत्रबाट बेपत्ता भएका हुन् । विजय सवार गाडी बाढीले बगाएको टंकले परिवारलाई जानकारी गराएका छन्। तर विजय गाडीबाट निस्केर कतै सुरक्षित स्थानमा पुगेको हुन सक्ने भन्दै परिवारको आशा अझै मरेको छैन।

घरमा भने विजयकी आमा मानकुमारीको आँखा बाटो हेर्दाहेर्दै थाक्न थालेको छ।

‘बाबा बितेको दुई महिना पनि भएको छैन,’ उनले भनिन्, ‘हजुरहरूले खोजेर ल्याइदिनुहोस्। छोरा अहिले सम्पर्कमा छैन।’

श्रीमान् बितेपछि घरको जिम्मेवारी विजयकै काँधमा थियो। आमा मानकुमारीको औषधि उपचारदेखि दैनिक घरखर्चसम्म उनैले धान्दै आएका थिए। मानकुमारी आफैं बिरामी छिन्। उपचार गराइरहेकी उनलाई अस्पताल लैजानेदेखि औषधि किनिदिने काम पनि विजयले नै गर्थे।

‘एउटा छोरा भर्खर विदेश गएको छ। मेरो कोही छैन। म बिरामी छु, उपचार गराउँदैछु,’ उनले नेपालवान एचडीसँग भनिन्, ‘गाडीमा  यताउता हिँडेर मलाई दबाई किनिदिने तिनै छोरा हुन्।’

छोरा हराएपछि मानकुमारीसँग न त जवाफ छ, न त कुनै खबर। उनको आशा भने अझै जीवित छ।

‘अहिले मेरो छोरा छैन। सम्पर्कमा छैन। खोजी कार्यमा सहयोग गरिदिनुहोस्,’ उनले सबैसँग अपिल गरिन्।

विजयकी दिदी शर्मिला खत्रीका लागि पनि यो पीडा शब्दमा व्यक्त गर्न कठिन छ। बुबालाई गुमाएको पीडा नसकिँदै भाइको अवस्था अज्ञात भएपछि परिवारमाथि अर्को ठूलो संकट आइपरेको छ।

‘बुबा क्यान्सरले बितेको दुई महिना भएको छैन। मेरो आमालाई कसले पाल्छ?’  भावुक हुँदै भनिन्, ‘कमाएर ल्याउने त्यही मात्रै भाइ हो। मैले पनि बिहे गरेर गइसकेँ।’

तर बुधबार बिहानदेखि फोन नलागेपछि उनको मनमा डर बढ्दै गएको छ।

‘मेरो भाइ हराएको छ। अहिलेसम्म अत्तोपत्तो छैन। अहिलेसम्म फोन सम्पर्क छैन,’ शर्मिलाले भनिन्।

विजयका नातामा दाइ पर्ने सुन्दर खत्रीले भने बाढी प्रभावित क्षेत्रमा खोजी तथा उद्धारमा खटिएका सबैलाई विजयको खोजीमा जुट्न आग्रह गरेका छन्।

परिवारका लागि अहिले विजयको कुनै एउटा खबर नै ठूलो आशा बनेको छ। बाढीले गाडी बगाएको खबर आएको छ, तर उनी बाँचेका छन् भन्ने आशा परिवारले छाडेको छैन।

आमाको एउटै आग्रह छ -‘मेरो छोरालाई खोजेर ल्याइदिनुहोस्।’