काठमाडौं। चीन–नेपाल सीमा क्षेत्रमा पर्ने तिब्बतमा भारी वर्षापछि आएको बाढी र पहिरोमा परी तीन जनाको मृत्यु भएको छ भने ५५८ जना अझै बेपत्ता रहेको चिनियाँ सरकारी सञ्चारमाध्यमले जनाएको छ। बेपत्तामध्ये २६० जना विदेशी नागरिक रहेको बताइएको छ।

बुधबार बिहान सीमावर्ती क्षेत्रमा पहिरो खसेर भवन तथा अन्य संरचना पुरिएपछि ठूलो संख्यामा उद्धारकर्मी परिचालन गरिएको छ। उद्धारका क्रममा खोजी कुकुर र ड्रोनको समेत प्रयोग भइरहेको छ।

चिनियाँ अर्धसैनिक पिपुल्स आर्म्ड पुलिसका अधिकारी ली किपुका अनुसार भौगोलिक अवस्था र साँघुरा पहाडी सडकका कारण उद्धारमा कठिनाइ भइरहेको छ। मुख्य प्रभावित क्षेत्रमा ठूला सवारीसाधन तथा भारी उपकरण पुर्‍याउन समस्या भए पनि आसपासका सडकबाट आवश्यक सामग्री लैजाने काम भइरहेको उनले बताएका छन्।

चिनियाँ सरकारी समाचार एजेन्सी सिन्ह्वाका अनुसार घटनास्थलमा करिब ८ सय उद्धारकर्मी र १५० भन्दा बढी सवारीसाधन परिचालन भएका छन्। अग्निशमन सेवाले पनि खोजी कुकुर, मानिसको उपस्थिति पत्ता लगाउने उपकरण र साना डुंगासहित ४३१ कर्मचारी परिचालन गरेको छ।

राहत तथा उद्धार सामग्री बोकेका नागरिक र सैन्य विमानसमेत प्रभावित क्षेत्रमा पुगेका छन्। रातभर वर्षा भइरहेकाले थप पहिरो र चट्टान खस्ने जोखिम कायमै रहेको अधिकारीहरूले बताएका छन्। यसले उद्धार कार्य थप जोखिमपूर्ण बन्न सक्ने जनाइएको छ।

तिब्बत स्वायत्त क्षेत्र विदेशी पत्रकारको पहुँचका हिसाबले संवेदनशील क्षेत्र मानिन्छ। त्यहाँ विदेशी पत्रकारलाई सामान्यतया चिनियाँ सरकारको समन्वयमा हुने भ्रमणमार्फत मात्र प्रवेश अनुमति दिइने व्यवस्था रहेको छ।