काठमाडौं। बाढीले बगाएर ल्याएको शवबाट सुनको मुन्द्रा लुछेको आरोपमा चितवनमा दुई जना पक्राउ परेका छन्।

मृतकको कानबाट सुनको मुन्द्रा निकालिरहेको भिडियो सामाजिक सञ्जालमा भाइरल भएपछि प्रहरीले घटनामा संलग्नको खोजी थालेको थियो। भिडियोका आधारमा पहिचान गरिएका दुई जनालाई प्रहरीले नियन्त्रणमा लिएको हो।

बाढीले बगाएर ल्याएको शवसमेत सुरक्षित नरहेको देखिने भिडियो सार्वजनिक भएपछि सामाजिक सञ्जालमा घटनाको चर्को विरोध भएको थियो। विपत्तिको समयमा मृतकप्रति देखाइएको यस्तो व्यवहारलाई अमानवीय भन्दै दोषीमाथि कडा कारबाहीको मागसमेत उठेको थियो। यसैबीच बिहिवार राप्रपा सांसद ज्ञानेन्द्र शाहीले पनि सर्वदलीय बैठकपछि घटनामा संलग्नलाई पक्राउ गरी कारबाही गर्न माग गरेका थिए।

पक्राउ परेकामाथि शवप्रति अमानवीय व्यवहार र चोरीसम्बन्धी प्रचलित कानुनअनुसार कारबाही अघि बढाइने प्रहरीले जनाएको छ। घटनाबारे थप अनुसन्धान भइरहेको छ।