काठमाडौं । रसुवाको भोटेकोशी क्षेत्रमा आएको विनाशकारी बाढीबाट प्रभावित नेपाली नागरिकका लागि अस्ट्रेलिया सरकारले ५० लाख अस्ट्रेलियन डलर आर्थिक सहायता उपलब्ध गराउने घोषणा गरेको छ।

अस्ट्रेलियाली सरकारले बाढीबाट प्रभावित समुदायको तत्कालीन आवश्यकता सम्बोधन गर्दै खाद्यान्न, आश्रय, स्वास्थ्य सेवा, सरसफाइ तथा पुनःस्थापनाका लागि उक्त रकम परिचालन गर्ने जनाएको छ।

अन्तर्राष्ट्रिय विकासमन्त्री डा. एनी एलीका अनुसार कुल सहयोगमध्ये २० लाख अस्ट्रेलियन डलर विश्व खाद्य कार्यक्रममार्फत खाद्यान्न वितरण तथा आपत्कालीन व्यवस्थापनमा खर्च गरिनेछ।

त्यसैगरी, अर्को २० लाख डलर अस्ट्रेलियाली ह्युम्यानिटेरियन पार्टनरसिपमार्फत गैरसरकारी संस्थाहरूलाई उपलब्ध गराइनेछ। सो रकमबाट बाढीपीडितका लागि अस्थायी आश्रय, कम्बल, सरसफाइका सामग्री तथा स्वास्थ्य र मनोसामाजिक सहयोगको व्यवस्था गरिनेछ।

बाँकी १० लाख अस्ट्रेलियन डलर इमर्जेन्सी एक्सन एलायन्समार्फत प्रभावित क्षेत्रमा स्थानीय तहको नेतृत्वमा सञ्चालन हुने पुनःस्थापना र पुनर्वासका कार्यक्रमका लागि प्रयोग गरिने अस्ट्रेलियाली सरकारले जनाएको छ।

यसैबीच, बाढीपछि नेपालमा रहेका कम्तीमा ३९ जना अस्ट्रेलियाली नागरिक सम्पर्कविहीन भएको जानकारी सरकारले दिएको छ। उनीहरूको अवस्था यकिन गर्न तथा प्रभावित नागरिकलाई आवश्यक सहयोग उपलब्ध गराउन अस्ट्रेलियाले कन्सुलर अधिकारीसहितको टोली नेपालमा परिचालन गरेको छ।

काठमाडौंस्थित अस्ट्रेलियाली दूतावासका कर्मचारीसँगै संकट प्रतिक्रिया टोलीका सदस्य र क्षेत्रीय कन्सुलर अधिकारीसमेत उद्धार तथा समन्वयका लागि खटिएका छन्।

अस्ट्रेलियाले आगामी ४८ घण्टाभित्र थप तीन जना मानवीय सहायता विशेषज्ञलाई नेपाल पठाउने तयारी गरेको छ। ‘अस्ट्रेलिया असिस्ट्स’ कार्यक्रमअन्तर्गत आउने उनीहरूले विपद्पछिको मानवीय अवस्थाको मूल्यांकन, सहायता व्यवस्थापन, सञ्चार तथा पुनःस्थापनाका लागि आवश्यक योजना निर्माणमा सहयोग गर्नेछन्।

अस्ट्रेलियाली सरकारले नेपालमा देखिएको विपद्को प्रभाव कम गर्न तत्कालीन राहतसँगै प्रभावित समुदायको दीर्घकालीन पुनःस्थापनामा समेत सहयोग गर्ने जनाएको छ।