काठमाडौं । रसुवाको बाढी प्रभावित क्षेत्रमा फसेका रसुवागढी भन्सार कार्यालयका कर्मचारीलाई तत्काल उद्धार गर्न परिवारजनले सरकारसँग आग्रह गरेका छन्।

सामाजिक सञ्जालमा सार्वजनिक भएको एक पोस्टमा श्रेयना पुरीले आफ्नी दिदी अनिता पुरीसहित रसुवागढी भन्सार कार्यालयका कर्मचारीहरू बाढी प्रभावित क्षेत्रमा फसेको भन्दै तत्काल हेलिकोप्टरमार्फत उद्धार गरिदिन सरकारसँग अपिल गरेकी छन्।

उनले बाढीबाट उद्धार गरिएका तथा सुरक्षित स्थानमा पुगेका केही कर्मचारीसँगको कुराकानीका आधारमा आफ्नी दिदीसहित अन्य कर्मचारीहरू अझै घरमै रहेको उल्लेख गरेकी छन्।

‘मेरो दिदीलगायतका कर्मचारीहरू यही घरमा हुनुहुन्छ। उहाँहरू एक सेकेन्डमै बाहिर निस्कन पनि सक्ने अवस्था छैन,’ उनले सामाजिक सञ्जालमा लेखेकी छन्।

बाढीले आसपासका क्षेत्रमा थप क्षति पुर्‍याइरहेको भन्दै उनले सरकारले ढिला नगरी उद्धारको व्यवस्था गर्नुपर्ने बताएकी छन्।

‘सरकार, यो अन्तिम गुहार हो। पीडित परिवारको सास एक सेकेन्डसम्म पनि अडिन नसक्ने अवस्था छ,’ उनले भावुक अपिल गर्दै भनेकी छन्।

उनले प्रधानमन्त्री बालेन्द्र शाह, गृहमन्त्री सुधन गुरुङलगायतलाई उल्लेख गर्दै फसेका कर्मचारीको तत्काल उद्धारका लागि पहल गर्न आग्रह गरेकी छन्।

सामाजिक सञ्जालमा सार्वजनिक भिडियो तथा तस्बिरमा बाढीले रसुवा क्षेत्रमा घर तथा संरचना डुबानमा परेको र आसपासको अवस्था अत्यन्तै जोखिमपूर्ण देखिएको छ। उद्धारमा ढिलाइ हुँदा भित्र फसेका कर्मचारीको ज्यान जोखिममा पर्न सक्ने भन्दै परिवारजनले सरकारको तत्काल ध्यानाकर्षण गराएका छन्।