नुवाकोट । नुवाकोटको गौरीबेँशीस्थित महेन्द्र माध्यमिक विद्यालयमा अभिभावक र विद्यार्थी गरी १६ जना उद्धारको पर्खाइमा रहेका छन् ।

विदुर नगरपालिका-४ बट्टार र ढुंगे बजार क्षेत्रका उनीहरू बाढी तथा विपद्का कारण विद्यालयमा रोकिएका हुन्। उद्धारको पर्खाइमा रहेकी अभिभावक सुनिता डंगोलले मोबाइलको ब्याट्री सकिन लागेको भन्दै तत्काल उद्धारको व्यवस्था गर्न आग्रह गरेकी छन्।

‘मोबाइल स्वीच अफ हुन लाग्यो। हाम्रो छिटो उद्धार होस्। यहाँ पानी खानसमेत पाएका छैनौँ,’ उनले भनेकी छन्।

डंगोलका अनुसार आकाशमा हेलिकप्टर देख्दा आफूहरूलाई उद्धार गर्न आएको हो कि भन्ने आशा जाग्ने गरेको छ। तर, हेलिकप्टर आए पनि आफूहरूको उद्धार हुन नसकेको भन्दै उनले गुनासो गरेकी छन्।

विद्यालयमा रहेका १६ जनाले तत्काल उद्धारका लागि सम्बन्धित निकायसँग आग्रह गरेका छन्।