रसुवा। रसुवास्थित माथिल्लो त्रिशूली जलविद्युत् आयोजनाको सुरुङभित्र फसेका ३५० जना सकुशल फेला परेका छन्। नेपाली सेनाले कठिन उद्धार अभियान सञ्चालन गर्दै उनीहरूलाई सुरुङबाट सुरक्षित रूपमा बाहिर निकालेको जनाएको छ।

बाढी तथा पहिरोका कारण सुरुङभित्र फसेका उनीहरूको अवस्थाबारे अन्योल भइरहेका बेला सेनाको टोलीले खोज तथा उद्धार अभियानमार्फत ३५० जनालाई सकुशल फेला पारेको हो।

उद्धारका क्रममा कठिन भूगोल तथा प्रतिकूल परिस्थितिका बीच सेनाले अभियान सञ्चालन गरेको बताइएको छ। उद्धार गरिएका व्यक्तिहरूलाई सुरक्षित स्थानमा लैजाने तथा आवश्यक सहयोग उपलब्ध गराउने काम भइरहेको छ।

यस्तै, सुरुङभित्र अझै १०० भन्दा बढी व्यक्ति रहेको प्रारम्भिक जानकारी आएको छ। नेपाली सेनाले उनीहरूको खोज तथा उद्धारलाई समेत प्राथमिकताका साथ अघि बढाइरहेको जनाएको छ।

बाढीपछि रसुवाका विभिन्न क्षेत्रमा ठूलो जनधनको क्षति भएको छ भने थुप्रै व्यक्ति सम्पर्कविहीन तथा जोखिममा रहेको बताइएको छ। सेनासहित सुरक्षा निकायले प्रभावित क्षेत्रमा खोज तथा उद्धार अभियानलाई तीव्र बनाएका छन्।