रसुवा। चीनको तिब्बत क्षेत्रमा छोचेन खोला र पुरेपू त्साङ्पो नदीको संगम आसपास पहिरोका कारण बनेको ठूलो ताल फुटेको जानकारी आएको छ।

ताल फुटेपछि त्यसबाट निस्किएको पानीले तल्लो तटीय क्षेत्रमा थप बाढीको जोखिम बढाएको आशंका गरिएको छ।

रसुवाका प्रमुख जिल्ला अधिकारी नरेन्द्र परियारका अनुसार चिनियाँ पक्षबाट उक्त ताल फुटेको जानकारी प्राप्त भएको हो।

ताल फुटेपछि पानीको बहाव बढ्न सक्ने भएकाले नेपालतर्फ समेत जोखिमको अवस्था उत्पन्न हुन सक्ने भन्दै स्थानीय प्रशासनले सतर्कता अपनाएको छ।

चीन-नेपाल सीमावर्ती क्षेत्रमा पछिल्ला दिनमा लगातार वर्षा, पहिरो र बाढीका कारण अवस्था अत्यन्त संवेदनशील बनेको छ।

पहिरोका कारण खोला तथा नदीको बहाव अवरुद्ध हुँदा विभिन्न स्थानमा अस्थायी ताल बनेका थिए। ती तालमा पानीको मात्रा बढ्दै गएपछि कुनै पनि बेला फुट्न सक्ने जोखिम रहेको भन्दै चिनियाँ पक्षले समेत उच्च सतर्कता अपनाउँदै आएको थियो।

ताल फुटेसँगै ठूलो परिमाणमा पानी तल्लो क्षेत्रमा बग्न थालेको हुन सक्ने भएकाले नदी तथा खोलाको तटीय क्षेत्रमा थप जोखिम बढेको प्रशासनको आकलन छ।

विशेषगरी सीमावर्ती क्षेत्र हुँदै नेपालतर्फ आउने नदी तथा खोलामा एक्कासि पानीको बहाव बढ्न सक्ने भएकाले तटीय क्षेत्रका बासिन्दालाई उच्च सतर्कता अपनाउन आग्रह गरिएको छ।

यसअघि पनि चीनको तिब्बत क्षेत्रमा पहिरोका कारण बनेका ताल तथा पानीको बहावका कारण बाढीको जोखिम बढेको थियो।