काठमाडाैं। रसुवाको भोटेकोशी नदीमा आएको भीषण बाढीपछि माथिल्लो त्रिशूली–३ ‘ए’ जलविद्युत् आयोजनाको भूमिगत पावरहाउस तथा सुरुङभित्र नेपाल विद्युत् प्राधिकरणका करिब ३५ कर्मचारी फसेको बताइएको छ।

नेपाल विद्युत् प्राधिकरणका कर्मचारी तथा कालीगण्डकी–७ निवासी उदयराज भट्टराईका अनुसार सुरुङभित्र रहेका कर्मचारीको अवस्था जोखिमपूर्ण बन्दै गएको छ। सुरुङभित्र अक्सिजनको कमी हुँदै गएकाले उनीहरूको जीवन थप जोखिममा परेको बताइएको छ।

यसअघि पनि त्रिशूली–३ ‘ए’ आयोजनाको सुरुङमा कर्मचारी तथा कामदार फसेको विवरण सार्वजनिक भएको थियो। शुक्रबार बिहान सुरुङबाट चार जनालाई नेपाली सेनाको हेलिकप्टरमार्फत उद्धार गरी अस्पताल पठाइएको सेनाले जनाएको छ। उद्धारका लागि नेपाली सेनाका ६ वटा र निजी क्षेत्रका ९ वटा हेलिकप्टर परिचालन गरिएको बताइएको छ।

यद्यपि, अझै सुरुङभित्र रहेका अन्य कर्मचारीको उद्धार चुनौतीपूर्ण बनेको छ। सुरुङको प्रवेशद्वारमा बाढी तथा पहिरोका कारण क्षति पुगेपछि उद्धार कार्य कठिन भएको बताइएको छ।

उद्धारमा ढिलाइ हुँदा सुरुङभित्र अक्सिजनको अवस्था र अन्य जोखिमलाई लिएर चिन्ता बढेको छ। यस्तो अवस्थामा उद्धार कार्यलाई उच्च प्राथमिकतामा राख्दै उपलब्ध सबै स्रोतसाधन परिचालन गर्न माग गरिएको छ।

यसअघि माथिल्लो त्रिशूली आयोजनाको सुरुङमा फसेका ३५० जनालाई नेपाली सेनाले उद्धार गरेको थियो।