काठमाडाैं। चीनको छोचेन खोला र पुरेपू त्साङ्पो नदीको संगम नजिक जमेको ठूलो तालमा रहेका ग्ल्यासियर फुटेर लेदोसहितको पानी ओभरफ्लो भएको सरकारले जनाएको छ। यद्यपि, तत्काल ठूलो जोखिमको अवस्था नरहेको सरकारको भनाइ छ।

बिहीबार मन्त्रिपरिषद्को बैठकपछि सञ्चारकर्मीसँग कुरा गर्दै सरकारका प्रवक्ता एवं शिक्षामन्त्री सस्मित पोखरेलले चीनतर्फको अवस्थाबारे जानकारी गराएका हुन्। उनका अनुसार ताल फुटेको भन्दा पनि आसपासका ग्ल्यासियर फुटेका कारण पानीमा लेदो मिसिएर ओभरफ्लो भएको हो।

उनले चीन सरकारसँग परराष्ट्र मन्त्रालयमार्फत निरन्तर सम्पर्क र समन्वय भइरहेको बताए। चिनियाँ पक्षबाट प्राप्त सूचनाअनुसार तत्काल ठूलो जोखिम नरहेको जानकारी आएको उनको भनाइ छ।

‘परराष्ट्र मन्त्रालयमार्फत चीन सरकारसँग निरन्तर संवाद भइरहेको छ। त्यहाँबाट पनि त्यस्तो ठूलो जोखिम नरहेको जानकारी आइरहेको छ। यद्यपि सबैलाई सतर्क रहन आग्रह गर्न चाहन्छु,’ प्रवक्ता पोखरेलले भने।

सरकारका अनुसार अहिलेसम्म बाँध वा ड्याम फुटेको पुष्टि भएको छैन। सामान्य रूपमा ग्ल्यासियर फुट्दा ठूलो परिमाणमा पानी र लेदो बगेर ओभरफ्लो भएको प्रवक्ता पोखरेलले स्पष्ट पारे।

‘कतै ड्याम फुटेको भन्ने छैन। सामान्य ग्ल्यासियरहरू फुटेका कारण धेरै ठाउँमा पानी लेदोसहित ओभरफ्लो भएको हो,’ उनले भने, ‘तत्काल त्यस्तो ठूलो जोखिम देखिएको छैन। तर सावधानी र सतर्कता अपनाउन आवश्यक छ।’

सरकारले तत्काल ठूलो जोखिम नरहेको बताए पनि चीनतर्फको हिमताल तथा ग्ल्यासियर फुट्ने घटनाबाट अचानक नदीमा पानीको बहाव बढ्न सक्ने भएकाले नदी आसपासका बासिन्दालाई उच्च सतर्कता अपनाउन आग्रह गरेको छ।