काठमाडौं । नेपालमा भोटेकोशी बाढीपछि जारी उद्धार तथा राहत अभियानलाई भारतले निरन्तर चासोका साथ नियालिरहेको छ। भारतीय विदेशमन्त्री एस. जयशंकरले नेपालमा भइरहेको उद्धार तथा राहत प्रयासबारे पछिल्लो अवस्थाका विषयमा छलफल गरेका छन्।

जयशंकरले नेपालमा आवश्यक पर्ने थप राहत सामग्री पठाउने तयारीबारे समेत भारतीय विदेश मन्त्रालयका सम्बन्धित निकायबाट जानकारी लिएका छन्। नेपालमा देखिएको विपद्को अवस्थालाई भारतले प्राथमिकताका साथ हेरिरहेको उनले बताएका छन्।

सामाजिक सञ्जालमार्फत जयशंकरले काठमाडौं र बेइजिङस्थित भारतीय दूतावासबाट नेपालमा रहेका भारतीय नागरिकको अवस्था तथा उनीहरूको सुरक्षासम्बन्धी पछिल्लो जानकारी प्राप्त भएको उल्लेख गरेका छन्।

नेपालमा आएको बाढीका कारण ठूलो जनधनको क्षति भएपछि भारतले उद्धार, राहत तथा मानवीय सहयोगमा सहकार्य गर्ने प्रतिबद्धता जनाउँदै आएको छ। आवश्यकताअनुसार थप राहत सामग्री उपलब्ध गराउने तयारीसमेत भइरहेको भारतीय पक्षले जनाएको छ।

नेपालमा रहेका आफ्ना नागरिकको अवस्थाबारे नियमित जानकारी लिँदै उनीहरूको सुरक्षालाई प्राथमिकतामा राखिएको पनि जयशंकरले बताएका छन्।