काठमाडौं । डा. धवलशम्सेर राणा नेतृत्वको जय नेपाल पार्टीले १३० सदस्यीय केन्द्रीय कार्यसमितिको नामावली सार्वजनिक गरेको छ। पार्टीले सोमबार प्रेस विज्ञप्ति जारी गर्दै केन्द्रीय कार्यसमितिको नामावली सार्वजनिक गरेको हो।

सार्वजनिक नामावलीअनुसार डा. धवलशम्सेर राणा सभापति रहेका छन्। समितिमा विभिन्न जिल्लाका १२७ जना केन्द्रीय सदस्य तथा दुई जना आमन्त्रित केन्द्रीय सदस्य रहेका छन्। पार्टीले केन्द्रीय सदस्यहरूको मर्यादाक्रम भने शीघ्र तय गरिने जनाएको छ।

केन्द्रीय कार्यसमितिमा काठमाडौंसहित बाँके, सुर्खेत, स्याङ्जा, जुम्ला, कालिकोट, पाँचथर, धनुषा, मोरङ, सुनसरी, झापा, दाङ, ललितपुर, कास्की, म्याग्दी, नुवाकोट, दोलखा, महोत्तरी, सिराहा, रुपन्देहीलगायत जिल्लाबाट प्रतिनिधित्व रहेको छ।

पार्टीको केन्द्रीय कार्यसमितिमा सगुन सुन्दर लावती, नारायणप्रसाद कोइराला, कर्णबहादुर शाही, केशवराज श्रेष्ठ, नवराज सिंखडा, धनसुर शाही, सुरेश आचार्य, प्रकाश जंग कार्की, रामराज कोइराला, प्रभात योगी, जनकबहादुर सिंह, दमन बस्नेत, होमनाथ गौतम, जयप्रकाश बगाले, डा. गोविन्द आचार्य, डा. महेन्द्र कार्कीलगायत रहेका छन्।

त्यस्तै, महिलातर्फ पवित्रा सुब्बा श्रेष्ठ, मिना शाही, राधाकुमारी शाही शाह, उमा श्रेष्ठ, लक्ष्मी कुमारी हमाल, राधिका जोशी, समृद्धी राणा, सुमिरा कार्की, अन्जना शाह रावल, वविना मोक्तान लावती, अन्जु कुमारी थपलिया, रेश्मा राणालगायतलाई केन्द्रीय सदस्य बनाइएको छ।

पार्टीले सिवाङ्गीनी राणा र अन्जली गिरीलाई आमन्त्रित केन्द्रीय सदस्य तोकेको छ।

यसैगरी, जय नेपाल पार्टीले ८ सदस्यीय सम्मानित सल्लाहकार समिति समेत गठन गरेको छ। समितिको संयोजकमा दिल विकाश राजभण्डारी रहेका छन्। सदस्यहरूमा प्रजापति कोइराला, मिरा राणा, डम्बर कार्की, क्या. जसबहादुर खेवाङ, लक्ष्मी माखिम, लक्ष्मी श्रेष्ठ र जगत जंग लावती रहेका छन्।

पार्टीका सचिवालय प्रमुख सगुन सुन्दर लावतीले प्रेस विज्ञप्तिमार्फत नयाँ केन्द्रीय कार्यसमिति र सम्मानित सल्लाहकार समितिको नामावली सार्वजनिक गरेका हुन्। पार्टीले आगामी दिनमा संगठन विस्तार तथा राजनीतिक गतिविधिलाई थप व्यवस्थित बनाउने तयारी गरेको जनाएको छ।