काठमाडौं। भारतका रक्षामन्त्री राजनाथ सिंहले नेपालमा आएको विनाशकारी बाढीबाट भएको मानवीय तथा भौतिक क्षतिप्रति दुःख व्यक्त गरेका छन् ।

नयाँ दिल्लीस्थित नेपाली दूतावास पुगेर सिंहले शोक पुस्तिकामा हस्ताक्षर गर्दै भारतीय सरकार र जनताका तर्फबाट नेपाल सरकार तथा नेपाली जनताप्रति समवेदना प्रकट गरेका हुन् ।

गत भदौ १० गते भोटेकोशी क्षेत्रमा आएको बाढीबाट ज्यान गुमाएकाहरूप्रति श्रद्धाञ्जली अर्पण गर्दै उनले प्राकृतिक विपत्तिबाट नेपालीसँगै भारतीयलगायत अन्य विदेशी नागरिकसमेत प्रभावित भएको उल्लेख गरेका छन् ।

सिंहले मृतकका परिवारप्रति समवेदना व्यक्त गर्दै घाइतेहरूको शीघ्र स्वास्थ्यलाभको कामना गरेका छन् ।

नेपाल–भारत सम्बन्धलाई स्मरण गर्दै उनले विपत्तिको समयमा भारत नेपालसँगै रहेको सन्देश दिएका छन् । उनका अनुसार भारतले नेपाललाई निकट मित्र तथा साझेदारका रूपमा सधैं सहयोग गर्दै आएको छ ।

नेपालमा जारी खोज, उद्धार तथा पुनर्स्थापनाका प्रयासमा आवश्यक सहयोग गर्न भारत प्रतिबद्ध रहेको सिंहले बताएका छन् ।

‘सुख–दुःखको साथी’का रूपमा भारतले यस कठिन परिस्थितिमा नेपाली नागरिकसँगै उभिने उनको भनाइ छ।