काठमाडौं। नेपाल-चीन सीमा क्षेत्रमा भोटेकोशी बाढीपछि बनेको तालको निगरानी गर्न दुईवटा सीसी क्यामेरा जडान गर्ने काम सुरु गरिएको छ ।

जलविज्ञान तथा जलस्रोत अनुसन्धान केन्द्रका अनुसार बाढीपछि बनेको उक्त ताल जुनसुकै बेला फुट्न सक्ने सम्भावना रहेकाले सम्भावित जोखिमको अवस्थाबारे तत्काल जानकारी लिन क्यामेरा राख्न लागिएको हो ।

भदौ १० गते भोटेकोशीमा आएको बाढीपछि नदीको बहाव र तालको अवस्थालाई निरन्तर निगरानीमा राख्न क्यामेरा जडान गर्न थालिएको केन्द्रले जनाएको छ ।

बाढीविद् सौहार्द जोशीका अनुसार क्यामेरा सञ्चालनमा आएपछि नदीको बहावमा आउने परिवर्तन तथा ताल फुट्न सक्ने सम्भावित अवस्थाको दृश्य निगरानी गर्न सहज हुनेछ ।