नुवाकोट । झोलुङ्गे पुल र मोटरेबल पुल यही १० भदौमा तिब्बतको ल्हेन्देखोला हुँदै भोटेकोशी र त्रिशूलीमा आएको बाढीले बगाएपछि त्रिशूली नदीमा तुइन निर्माण थालिएको छ ।

सिम्बुटारदेखि त्रिशूली बजारमाथि गोम्बा क्षेत्रमा एउटा तुइन निर्माण भइरहेको हो । निर्माणको काम आधाउधी सकिएको छ ।

झोलुङ्गे पुल र मोटरेबल पुल दुवै भीषण बाढीले बगाएपछि नुवाकोट सदरमुकाम विदुर आसपासका बजारहरू देवीघाट, दम्की, ढुंगेबजारदेखि सिम्बुटारसम्मका मानिसहरू नदी पारिपट्टीको त्रिशूली बजार जान पाएका छैनन् ।

त्रिशूली बजारका मानिसहरू पनि वारिपट्टी आउन पाएका छैनन् । यही १० भदौमा त्रिशूली नदीमा बाढी आएपछि वारिका वारी र पारिका पारी नै भए ।

तत्काल मोटरेबल (बेलिब्रिज) पुल निर्माण सम्भव नहुने भएपछि मानिसहरू आवतजावतमा सहज होस् भनेर तुइन निर्माण थालिएको बागमती प्रदेश सांसद रमेश महतले बताए ।

यस्तै, देवीघाट क्षेत्रबाट पनि त्रिशूली बजारको तल्लो क्षेत्रलाई लक्षित गरी तुइन निर्माणको काम थालनी भएको छ ।