काठमाडौं। रसुवामा आएको विनाशकारी बाढीका कारण स्थगित भएको प्रतिनिधिसभा बैठक बुधवार चल्ने भएको छ। 

बैठकमा बाढीमा भएको मानवीय तथा भौतिक क्षति र सरकारले अघि बढाइरहेको खोजी, उद्धार, राहत तथा पुनःस्थापनाबारे सरकारले प्रतिनिधिसभालाई जानकारी गराउनेछ।

प्रतिनिधिसभाको बैठक दिउँसो १ बजे बस्दैछ। बैठकमा सरकारका तर्फबाट एक जना मन्त्रीले बाढीपछिको अवस्था र सरकारले गरिरहेको कामबारे जानकारी गराउने तयारी भएको संघीय संसद् सचिवालयले जनाएको छ।

यद्यपि, जानकारी गराउने मन्त्रीको नाम भने अहिलेसम्म टुंगो लागेको छैन।

संघीय संसद् सचिवालयका सहसचिव एवं प्रवक्ता एकराम गिरीका अनुसार सरकारका तर्फबाट एक मन्त्रीले सदनलाई विपद्को अवस्थाबारे जानकारी गराउन सक्ने बताएका छन्। 

बुधवारको बैठकमा सभामुखले रसुवा बाढीसम्बन्धी विशेष प्रस्तावसमेत प्रस्तुत गर्ने कार्यक्रम छ। त्यसअघि विभिन्न राजनीतिक दलका नेताहरूले सदनलाई सम्बोधन गर्नेछन्।

नेताहरूको सम्बोधनपछि सरकारका तर्फबाट मन्त्रीले बाढीबाट भएको क्षति, खोजी तथा उद्धारको अवस्था र आगामी तयारीबारे जानकारी दिने तयारी छ।

गत भदौ १० गते भोटेकोशी र त्रिशूली नदीमा आएको भीषण बाढीले रसुवाको टिमुरे, स्याफ्रुवेशी, बेत्रावतीसहित नुवाकोटको त्रिशूली बजार, देवीघाट तथा धादिङ, चितवन र गोरखाका त्रिशूली नदी आसपासका क्षेत्रमा ठूलो क्षति पुर्‍याएको थियो।

बाढीपछि ठूलो संख्यामा मानिसको मृत्यु भएको तथा स्वदेशी र विदेशी नागरिकसमेत बेपत्ता रहेको विवरण सार्वजनिक भएका छन्। प्रभावित क्षेत्रमा अझै खोजी तथा उद्धारको काम जारी छ।

यसअघि मंगलबार राष्ट्रिय सभाले पनि रसुवा बाढीबारे विशेष प्रस्ताव पारित गरेको थियो। 

राष्ट्रिय सभाको बैठकमा सांसदहरूले विपद्बाट भएको क्षति र उद्धार तथा राहतको अवस्थाबारे सरकारको ध्यानाकर्षण गराएका थिए। तर त्यहाँ सरकारका तर्फबाट बाढीबारे औपचारिक जानकारी प्रस्तुत गरिएको थिएन।