काठमाडौं । दक्षिण कोरियाली अभिनेता जंग इल-वू नेपालमा आएको विनाशकारी बाढीबाट प्रभावित नागरिक तथा बालबालिकाको सहयोगमा जुटेका छन्।

गुड नेबर्सले बुधबार अभिनेता इल-वूले बाढीपछिको पुनःस्थापना तथा विस्थापित परिवारको सहयोगका लागि आर्थिक सहायता प्रदान गरेको जनाएको छ। उक्त सहयोग नुवाकोट, गोरखालगायत बाढीबाट बढी प्रभावित क्षेत्रमा आपतकालीन राहतका लागि परिचालन गरिनेछ।

गुड नेबर्सले यसअघि नै प्रभावित क्षेत्रमा राहत तथा पुनःस्थापनाका काम सुरु गरिसकेको छ। नुवाकोटका विस्थापित परिवारलाई खाद्यान्न, अत्यावश्यक घरायसी सामग्री र सरसफाइका सामग्री उपलब्ध गराउँदै आएको संस्थाले जनाएको छ।

बाढी प्रभावित बालबालिकाको पुनःस्थापनाका लागि संस्थाले बालमैत्री स्थल सञ्चालन गर्नुका साथै उनीहरूलाई आवश्यक मनोसामाजिक सहयोगसमेत उपलब्ध गराइरहेको छ।

इल-वूको यो सहयोगसँगै उनी गुड नेबर्सको विशेष दाता समूह ‘द नेबर्स क्लब’मा समेत आबद्ध भएका छन्। वार्षिक कम्तीमा १० मिलियन वन सहयोग गर्ने तथा नियमित रूपमा योगदान गर्ने दाताहरूलाई उक्त समूहमा समेटिने बताइएको छ।

इल-वूले प्राकृतिक विपद्बाट प्रभावित नेपाली नागरिक र बालबालिकालाई आफूले सकेको सहयोग गर्न चाहेको बताएका छन्। उनले बाढी प्रभावित क्षेत्र छिट्टै पुनःस्थापित भई पीडितहरू सामान्य दैनिकीमा फर्कन सकून् भन्ने कामना पनि गरेका छन्।

गुड नेबर्सले प्रभावित क्षेत्रको अवस्थाको निरन्तर अनुगमन गर्दै आपतकालीन राहत र बालबालिका केन्द्रित सहयोग कार्यक्रमलाई अघि बढाउने जनाएको छ।