काठमाडौं। नेपाली कम्युनिष्ट पार्टी (नेकपा)का संयोजक पुष्पकमल दाहाल ‘प्रचण्ड’ले भोटेकोशी बाढीबाट सिर्जित संकट समाधानमा सरकारको कार्यशैली प्रभावकारी नभएको संकेत गरेका छन्।

बुधबार प्रतिनिधिसभा बैठकमा बोल्दै प्रचण्डले सेना परिचालन गरेर मात्रै विपद्को सामना गर्न नसकिने भन्दै राज्यका सबै संयन्त्रसँगै व्यापक जनपरिचालन आवश्यक रहेको बताए।

उनले सामाजिक सञ्जालमा पोस्ट गरेर मात्रै संकट समाधान नहुने टिप्पणी गर्दै सरकारलाई प्रचारभन्दा विपद् व्यवस्थापनमा केन्द्रित हुन सुझाव दिए।

‘सोसल मिडियामा पोस्ट गरेर तपाईंहरूले चुनाव त जित्नुभयो, अहिलेको संकट समाधान हुँदैन,’ प्रचण्डले भने।

उनले विपद्को गम्भीरतालाई बुझेर सरकार, राजनीतिक दल, सुरक्षा निकाय र नागरिक सबैको संयुक्त प्रयास आवश्यक रहेको बताए।