काठमाडौं। प्रतिपक्षी दल नेकपाका संयोजक तथा संसदीय दलका नेता पुष्पकमल दाहाल ‘प्रचण्ड’ले प्रधानमन्त्री बालेन्द्र शाहको कार्यशैलीप्रति असन्तुष्टि जनाउँदै संसद् र राजनीतिक दललाई विश्वासमा लिएर अघि बढ्न आग्रह गरेका छन्।

बुधबार प्रतिनिधिसभाको बैठकमा सम्बोधन गर्दै प्रचण्डले प्रधानमन्त्री संसद्मा आएर केही विषयबारे जानकारी गराएर फर्किएको भन्दै त्यसले मात्र संसद्को विश्वास हासिल नहुने बताए। सरकारको नेतृत्वले सत्ता पक्ष र प्रतिपक्ष मात्र नभई संसद्मा रहेका सबै सांसद तथा राजनीतिक शक्तिलाई विश्वासमा लिनुपर्ने उनको भनाइ थियो।

प्रचण्डले प्रधानमन्त्रीको वर्तमान कार्यशैली हेर्दा आफ्नै सांसदहरूलाई समेत पर्याप्त रूपमा विश्वासमा लिने प्रयास नभएको टिप्पणी गरे। प्रधानमन्त्री संसद्मा आएर सांसदहरूसँग संवाद नगरी फर्किने शैली उपयुक्त नभएको भन्दै उनले यस्तो व्यवहारले राजनीतिक सहकार्य बलियो बनाउन नसक्ने बताए।

उनले भने, ‘उहाँ आउनुहुन्छ कसैको अनुहार नहेरि जानुहुन्छ यो के तरिका हो ? यस्तो हुँदैन। प्रधानमन्त्री त हामी सबैको हो। जतिबेला हामी सबैले सहयोग गर्छौं भनिरहेका छौं । भन्दा भन्दै कसैको पनि अनुहार हेर्न नपर्ने के हो त्यो तरिका?’

प्रचण्डले प्रधानमन्त्री शाहलाई वर्तमान संकटका बेला ठूलो अवसर प्राप्त भएको भन्दै त्यसलाई गुम्न दिन नहुने बताए। अहिलेको अवस्थामा लामो भाषणभन्दा प्रभावकारी नेतृत्व र जनतामाझ सरकारको प्रत्यक्ष उपस्थिति आवश्यक रहेको उनको भनाइ थियो।

उनले देशले अहिले आश्वासनभन्दा काम खोजिरहेको उल्लेख गर्दै विपद्मा परेका नागरिकले हरेक ठाउँमा राज्यको उपस्थिति अनुभूति गर्न पाउनुपर्ने बताए।

प्रचण्डले प्रधानमन्त्रीलाई सामाजिक सञ्जालमा सन्देश लेखेर मात्र संकट समाधान नहुने चेतावनीसमेत दिए। चुनावका बेला सामाजिक सञ्जाल प्रभावकारी माध्यम बने पनि अहिले उत्पन्न राष्ट्रिय संकट समाधान गर्न त्यही माध्यम मात्र पर्याप्त नहुने उनको टिप्पणी थियो।

उनले भने, ‘सामाजिक सञ्जालमा पोस्ट गरेर तपाईंहरूले चुनाव त जित्नुभयो, तर यो संकट समाधान हुँदैन।’

प्रचण्डले अहिले मुलुक गम्भीर संकटमा रहेकाले राजनीतिक दल, राज्यका सबै निकाय र नागरिकबीच एकता आवश्यक रहेको बताए। संकटका बेला राज्यको उपस्थिति देखिनुपर्ने र विपत्तिमा राष्ट्र एकजुट भएको सन्देश जनताले पाउनुपर्ने उनको भनाइ थियो।

राष्ट्रिय एकता कायम गर्ने मुख्य जिम्मेवारी प्रधानमन्त्रीकै भएको उल्लेख गर्दै प्रचण्डले सबै राजनीतिक शक्तिलाई विश्वासमा लिएर अघि बढ्न शाहलाई आग्रह गरे।

उनले प्रधानमन्त्री शाहलाई आफूले नेतृत्व गरेको नयाँ राजनीतिक परिस्थितिमा सबैलाई समेटेर अघि बढ्ने अवसर रहेको भन्दै समयमै गम्भीर निर्णय लिन सुझाव दिए। प्रधानमन्त्रीले सबैको विश्वास जित्न नसके समयले कसैलाई पनि नपर्खिने चेतावनीसमेत उनले दिए।

प्रचण्डले अहिलेको संकटलाई राजनीतिक प्रतिस्पर्धाभन्दा माथि राखेर सरकारलाई आवश्यक सहयोग गर्न आफूहरू तयार रहेको संकेत गर्दै प्रधानमन्त्रीले पनि सबै राजनीतिक शक्तिलाई समान रूपमा विश्वासमा लिनुपर्नेमा जोड दिए।