काठमाडौं । भोटेकोशी बाढीको कहर अझै थामिएको छैन। बाढीमा परेर ज्यान गुमाएकामध्ये अहिलेसम्म १ हजार ३४४ जनाको शव फेला परेको छ भने ४ हजार ८९८ जना अझै बेपत्ता छन्।

नेपाल प्रहरीले सार्वजनिक गरेको पछिल्लो विवरणअनुसार फेला परेका शवमध्ये ४८९ पुरुष, २६९ महिला, ५२ बालक र ३३ बालिका छन्। थप ५०१ मानव शरीरका आंशिक अंग समेत फेला परेका छन्। तीमध्ये अधिकांशको पहिचान हुन बाँकी छ।

बेपत्ताको सूचीमा २ हजार ९३० नेपाली र ६१८ विदेशी नागरिक छन्। नेपालीतर्फ मात्रै २ हजार ४४८ पुरुष र ४८२ महिला बेपत्ता रहेको प्रहरीको तथ्याङ्क छ। थप १ हजार ३५० जनाको बेपत्ता भएको सूचना फोनमार्फत प्राप्त भएको प्रहरीले जनाएको छ।

विपद्को बीचबाट हालसम्म ८ हजार ६३१ जनालाई जीवितै उद्धार गरिएको छ। उद्धार गरिएकामध्ये ७ हजार ३८७ नेपाली र १ हजार २४४ विदेशी नागरिक छन्। घरबार गुमाएर विस्थापित भएका ३ हजार ६५५ जनालाई विभिन्न होल्डिङ सेन्टरमा राखिएको छ।

खोजी तथा उद्धारमा मात्रै ७ हजार २१२ प्रहरी परिचालन गरिएको छ। उद्धारकै क्रममा ६५ प्रहरी कर्मचारीसमेत बाढीबाट प्रभावित भएका छन् भने २५ जना प्रहरी अझै सम्पर्कविहीन छन्।

फेला परेका शवमध्ये १ हजार ३० वटाको जमिनमा व्यवस्थापन गरिएको प्रहरीले जनाएको छ। शवको पहिचानका लागि डीएनए परीक्षणलाई पनि तीव्र पारिएको छ।

हालसम्म १ हजार २६० मृतक र ९७२ आफन्त गरी २ हजार २३२ जनाको डीएनए नमुना संकलन गरिएको छ। पहिचान हुन नसकेका १ हजार २७० जनाको विवरणसमेत वेबसाइटमा सार्वजनिक गरिएको प्रहरीले जनाएको छ।

बेपत्ताको संख्या अझै ठूलो रहेकाले खोजी अभियानसँगै शव पहिचान र परिवारसम्म यथार्थ सूचना पुर्‍याउने काम पनि उत्तिकै चुनौतीपूर्ण बनेको छ।