काठमाडौं । यस शुक्रबारदेखि नेपाली चलचित्र भवनमा तीन नेपालीसहित तीन विदेशी फिल्म प्रदर्शनमा आउने भएका छन्। भदौ २६ गतेदेखि ‘पेन्सन पट्टा’, ‘बेहुली’ र ‘अक्षरा’सँगै ‘हनुमान अंश’, ‘फल २ : डेडपोइन्ट’ र ‘हैवान’ दर्शकमाझ आउन लागेका हुन्।

माओत्से गुरुङको निर्देशनमा तयार भएको ‘पेन्सन पट्टा’ सामाजिक तथा भावनात्मक कथामा आधारित चलचित्र हो। दयाहाङ राई, गौमाया गुरुङ, बुद्धि तामाङ र विल्सन विक्रम राईलगायत कलाकारको अभिनय रहेको फिल्मले ऋण, पारिवारिक जिम्मेवारी, बाबुको निधनपछि आउने संकट तथा आमा–छोराबीचको सम्बन्धलाई कथाको केन्द्रमा राखेको छ।

सशान कँडेल निर्देशित ‘बेहुली’ पारिवारिक कथामा आधारित चलचित्र हो। प्रेम, सम्बन्ध, मित्रता र पारिवारिक भावनालाई समेटिएको फिल्ममा पारस बम ठकुरी ‘कुल ब्वाइ’, दिव्या रायमाझी, पदम तामाङ र सुशान्त कार्कीलगायत कलाकारको अभिनय छ। अर्जुन पोखरेल फिल्मका प्रस्तुतकर्ता हुन्।

विनय राज पौडेलको निर्देशन रहेको ‘अक्षरा’ सामाजिक–पारिवारिक विषयमा केन्द्रित छ। महिलाको पहिचान, पारिवारिक सम्बन्ध, सामाजिक मूल्य र चुनौतीलाई कथामा समेटिएको फिल्ममा सुशील सिटौला, न्यान्सी खड्का, सुशील पोखरेल, पुष्कर राउत र रिस्ता बस्नेतलगायत कलाकार देखिन्छन्।

विदेशी फिल्मतर्फ हिन्दी चलचित्र ‘हनुमान अंश’ पनि यही शुक्रबारबाट नेपालमा प्रदर्शन हुँदैछ। नीम करोली बाबाको जीवन र दर्शनलाई आधार बनाइएको यो फिल्म आध्यात्मिक यात्राको कथामा निर्माण गरिएको हो। विशाल चतुर्वेदी निर्देशित फिल्ममा शोभिनव सत्या, चन्दन के आनन्द, अनिल रस्तोगी, पूर्णिमा तिवारी र विहान शेड्गेलगायत कलाकार छन्।

त्यस्तै, हलिउड चलचित्र ‘फल २ : डेडपोइन्ट’ पनि नेपाली हलमा लाग्दैछ। साहसिक तथा रोमाञ्चक कथामा आधारित फिल्ममा दुई युवती खतरनाक पर्वत आरोहणका क्रममा करिब चार हजार फिटको उचाइमा संकटमा फस्छन्। त्यसपछि उनीहरूले ज्यान जोगाउन आफ्नै डर र जोखिमसँग संघर्ष गर्नुपर्ने अवस्था आउँछ। माइकल स्पिरिग र पिटर स्पिरिग निर्देशित फिल्ममा ह्यारिएट स्लेटर, अर्सेमा थोमस, टम ब्रिट्नी र ग्रेस क्यारोलिन करीको अभिनय छ।

अर्कोतर्फ, प्रियदर्शन निर्देशित हिन्दी एक्सन–क्राइम ड्रामा ‘हैवान’ पनि यही मितिबाट प्रदर्शनमा आउनेछ। फिल्ममा दृष्टिविहीन मार्सल आर्ट खेलाडीले एक बालिकालाई मनोरोगी हत्याराबाट बचाउन गर्ने संघर्षलाई मुख्य कथाका रूपमा प्रस्तुत गरिएको छ। सैफ अली खान र अक्षय कुमार फिल्मका प्रमुख कलाकार हुन्।

यसरी शुक्रबारदेखि नेपाली हलमा फरक स्वाद र शैलीका ६ चलचित्र एकसाथ प्रदर्शनमा आउने भएका छन्। तर रसुवा बाढीपछि सिर्जिएको परिस्थितिलाई ध्यानमा राख्दै केही नेपाली चलचित्रले भने आफ्नो प्रदर्शन मिति पछाडि सारेका छन्। नयाँ चलचित्रमध्ये दर्शकको रोजाइमा कुन पर्छ भन्ने परिणाम भने प्रदर्शनपछि नै देखिनेछ।