काठमाडौं । आगामी नेपाली चलचित्र ‘जलाकी’की अभिनेत्री साहारा हाङमा लिम्बुको चरित्र पोस्टर सार्वजनिक गरिएको छ । कुशे औंसी अर्थात् बुवाको मुख हेर्ने दिनको अवसर पारेर निर्माण पक्षले उनको एकल पोस्टर सार्वजनिक गरेको हो ।

चलचित्रमा मुख्य अभिनेत्रीमध्येकी एक साहारा पोस्टरमा मगर समुदायको सांस्कृतिक पहिरनमा देखिएकी छन् । उनको अनुहारमा प्रसन्नता भए पनि भावभङ्गिमामा सोचमग्न देखिन्छिन् ।

‘जलाकी’ साहाराको नेपाली चलचित्र क्षेत्रमा पहिलो यात्रा हो । चलचित्रमा उनले आधुनिक सोच र स्वतन्त्र स्वभाव भएकी युवतीको भूमिका निर्वाह गरेकी छन् । पोखराकी सफल व्यवसायीकी छोरीको भूमिकामा प्रस्तुत हुने उनको पात्र पारिवारिक रूपमा सम्पन्न पृष्ठभूमिबाट आएको निर्माण पक्षले जनाएको छ ।

सिक्किमकी साहारा किशोरावस्थामै सौन्दर्य प्रतियोगितामार्फत चर्चामा आएकी थिइन् । उनले मिस टिन इन्डिया २०२२ को उपाधिसमेत जितेकी छन् । त्यसबाहेक विभिन्न राष्ट्रिय तथा अन्तर्राष्ट्रिय सौन्दर्य प्रतियोगितामा सहभागिता जनाएकी साहाराले मण्डला थिएटरमा अभिनय प्रशिक्षणसमेत लिएकी छन् । ‘जलाकी’मा उनी अडिसनमार्फत छनोट भएकी हुन् ।

तर, साहाराका लागि ‘जलाकी’ केवल अभिनयको सुरुवात मात्र होइन, व्यक्तिगत रूपमा निकै भावुक यात्रा पनि बनेको छ । चलचित्रको छायांकनकै क्रममा उनको बुबाको कार दुर्घटनामा निधन भएको थियो । चलचित्रका लागि काठमाडौं आउनुअघि बुबासँग भएको भेट नै उनीहरूको अन्तिम भेट बन्न पुग्यो ।

साहाराका अनुसार चलचित्रमा काम गर्ने अवसर पाएको खबर सुनाउँदा उनका बुबा निकै खुसी भएका थिए । छोरी अभिनेत्री बनेर फर्किएपछि स्वागत गर्ने आफ्नो चाहना बुबाले व्यक्त गरेको उनी सम्झिन्छिन् । बुबाको निधनपछि पनि उनको सपना पूरा गर्ने उद्देश्यले साहारा केही दिनमै छायांकनमा फर्किएकी थिइन् ।

उनले आफू मानसिक रूपमा निकै कठिन अवस्थामा रहे पनि परिवार र निर्माण टोलीको साथले कामलाई निरन्तरता दिन सकेको बताएकी छन् । अभिनयमा आउन परिवार र समाजसँग संघर्ष गर्दा सबैभन्दा बलियो साथ बुबाबाटै पाएको उनको भनाइ छ ।

निर्देशक अशोक थापा मगरले आफूलाई डेब्यु कलाकारका रूपमा मात्र नभई परिवारको सदस्यजस्तो व्यवहार गरेर मार्गदर्शन गरेको साहाराले बताएकी छन् । छायांकार शैलेन्द्र डी. कार्की तथा चलचित्रको सम्पूर्ण टोलीबाट समेत राम्रो सहयोग पाएको उनको भनाइ छ ।

साहाराले ‘जलाकी’लाई आफ्नो ‘ड्रिम प्रोजेक्ट’का रूपमा लिएकी छन् । चलचित्रको कथा र आफूले निर्वाह गरेको पात्रसँग व्यक्तिगत रूपमा समेत सम्बन्ध जोड्न सकेको उनको भनाइ छ ।

अशोक थापा मगरको निर्देशनमा बनेको ‘जलाकी’ आगामी मंसिर ४ गतेदेखि देशभर प्रदर्शनमा आउने तयारीमा छ । चलचित्रमा साहारासहित सोनम तोप्देन, उपासना सिंह ठकुरी, शिल्पा मास्के, माओत्से गुरुङ, बुद्धि तामाङ, अस्तित्व भट्टचन, रजनी गुरुङ, राजु रेग्मी मगर, उषा खड्की, खड्कबहादुर पुनलगायत कलाकारको अभिनय छ ।

एम मिडिया प्रोडक्सनको ब्यानरमा निर्माण भएको चलचित्रमा ओम घर्ती मगर, वीरबहादुर लामा, चन्द्रबहादुर भट्टचन, बेताने मगर, मानबहादुर धनाह मगर र सुस्मिता बुढाथोकी निर्माता रहेका छन् । चलचित्रको छायांकन शैलेन्द्र डी. कार्कीले गरेका हुन् ।