काठमाडौं । राजविराजस्थित गजेन्द्रनारायण सिंह सगरमाथा अस्पतालले भर्ना नलिएपछि स्थानीय महिलाले फुटपाथमै बच्चा जन्माएको घटनाको छानबिन गर्न स्वास्थ्य मन्त्रालयले टोली परिचालन गरेको छ ।

स्वास्थ्य मन्त्री निशा मेहताले शुक्रबार सिंहदरबारमा बसेको प्रतिनिधिसभाअन्तर्गतको शिक्षा समितिको बैठकमा घटना सार्वजनिक भएलगत्तै छानबिन टोली गठन गरी राजविराज पठाइएको जानकारी दिएकी हुन् ।

मन्त्रीका अनुसार नेपाल मेडिकल काउन्सिलका रजिस्ट्रारको नेतृत्वमा पाँच सदस्यीय ‘एथिकल कमिटी’ र मन्त्रालयको क्युरेटिभ डिभिजन प्रमुख डा. पवन रायमाझी सम्मिलित संयुक्त टोली गठन गरिएको हो ।

टोलीले घटनाको सत्यतथ्य पत्ता लगाउन राजविराजमै पुगेर जाँचबुझ गरिरहेको मन्त्री मेहताले बताइन् ।

स्वास्थ्यकर्मी, अस्पताल प्रशासन, नर्सिङ वा पारामेडिक्समध्ये जोसुकैको कमजोरी वा लापरबाही पुष्टि भए पनि मन्त्रालयले दोषीमाथि कानुनी कारबाही अघि बढाउने उनको भनाइ छ ।

बैठकमा सांसद रमेश मल्लले संघीय सरकार मातहतको अस्पतालमै यस्तो गम्भीर घटना हुनुमा स्वास्थ्य मन्त्री र सचिवले नैतिक जिम्मेवारी लिनुपर्ने बताए ।

उनले घटनामा संलग्न दोषीमाथि तत्काल छानबिन गरी कडा कानुनी कारबाही गर्न माग गरे । सरकारी अस्पतालमा आगामी दिनमा यस्ता घटना दोहोरिन नदिन मन्त्रालयले ठोस योजना ल्याउनुपर्ने उनको भनाइ थियो ।