काठमाडौं । प्रधानमन्त्री वालेन्द्र शाह (बालेन)ले जलवायु परिवर्तनबाट नेपालले भोगिरहेको क्षति र जोखिमबारे अन्तर्राष्ट्रिय समुदायको ध्यानाकर्षण गराउने बताएका छन्।

मुस्ताङमा आयोजित ‘घरपझोङ जलवायु सम्मेलन’का लागि शुभकामना सन्देश दिँदै प्रधानमन्त्री शाहले जलवायुजन्य विपद् न्यूनीकरण तथा व्यवस्थापनका लागि विश्वव्यापी सहयोग र सहकार्य आवश्यक रहेको बताएका हुन्।

उनले आगामी संयुक्त राष्ट्रसंघको ८१औँ महासभामा नेपालले जलवायु परिवर्तनका कारण भोगिरहेका समस्या, क्षति र समाधानका उपायलाई प्राथमिकताका साथ उठाउने प्रतिबद्धता जनाएका छन्।

नेपालका हिमाली, पहाडी र तराई क्षेत्रमा जलवायु परिवर्तनले पारिरहेको प्रभावबारे राष्ट्रिय तथा अन्तर्राष्ट्रिय समुदायलाई जानकारी गराउने उनको भनाइ छ।

प्रधानमन्त्री शाहले विश्वव्यापी तापक्रम वृद्धिको प्रत्यक्ष असर नेपालका हिमाली क्षेत्रमा देखिन थालेको बताएका छन्।

उनका अनुसार हिमाल पग्लिने, हिमचट्टान टुक्रिने, हिमताल फुट्ने, हिमनदीको बहाव बढ्ने तथा पानीका मुहान सुक्दै जाने समस्या बढिरहेका छन्। मौसममा देखिन थालेको अप्रत्याशित परिवर्तनले हिमाली क्षेत्र मात्र नभई समग्र नेपाली जनजीवन प्रभावित भइरहेको उनले बताएका छन्।

जलवायु परिवर्तनको असर कृषि, जैविक विविधता र स्थानीय जनजीवनमा समेत पर्न थालेको भन्दै प्रधानमन्त्रीले जोखिम न्यूनीकरणलाई विकास योजनाकै महत्वपूर्ण हिस्सा बनाउनुपर्नेमा जोड दिएका छन्।

जलवायु परिवर्तनका कारण सिर्जित चुनौती सामना गर्न संघ, प्रदेश र स्थानीय तहबीच प्रभावकारी समन्वय आवश्यक रहेको प्रधानमन्त्री शाहले बताएका छन्।

स्थानीय तहले भोगिरहेका जलवायुजन्य समस्या र जोखिमलाई नीतिगत तहमा जोड्दै दीर्घकालीन समाधान खोज्नुपर्ने उनको भनाइ छ।

नेपालले जलवायु परिवर्तनको असर कम गर्न अन्तर्राष्ट्रिय सहयोग र सहकार्य खोज्ने मात्र नभई आफ्ना वास्तविक समस्या र क्षतिको तथ्यसहित विश्वमञ्चमा बलियो रूपमा प्रस्तुत गर्नुपर्नेमा पनि प्रधानमन्त्रीले जोड दिएका छन्।