काठमाडौं । सत्तारुढ राष्ट्रिय स्वतन्त्र पार्टी (रास्वपा) का सांसद जगदीश खरेलले ‘प्रधानमन्त्री दैवी प्रकोप उद्धार कोष’को नाम परिवर्तन गरी ‘प्रधानमन्त्री विपत् राहत कोष’ राख्न माग गरेका छन्।

मंगलबार बसेको प्रतिनिधिसभाको बैठकमा बोल्दै खरेलले विपत्लाई ‘दैवी’ भनेर परिभाषित गर्ने पुरानो कानुनी व्यवस्था नै परिवर्तन भइसकेकाले कोषको नाम पनि समयअनुकूल बनाउनुपर्ने बताए।

उनका अनुसार २०७४ सालमा जारी भएको विपत् जोखिम न्यूनीकरण तथा व्यवस्थापन ऐन र त्यसपछिको नियमावलीले विपत् व्यवस्थापनको नयाँ कानुनी आधार तय गरिसकेको छ।

‘२०३९ सालमा बनेको दैवी प्रकोप उद्धार ऐनलाई विस्थापित गरेर आएपछि अब दैवी रहेन,’ खरेलले भने, ‘त्यसैले प्रधानमन्त्री तथा प्रधानमन्त्री कार्यालयलाई अनुरोध छ– प्रधानमन्त्री दैवी प्रकोप उद्धार कोषको नाम परिवर्तन गरेर अब प्रधानमन्त्री विपत् राहत कोष कायम गरियोस्।’

उनले अहिलेको अवस्थामा विपत्लाई दैवी शक्तिसँग जोडेर हेर्नुभन्दा जोखिम न्यूनीकरण, उद्धार, राहत र पुनर्स्थापनाको आधुनिक अवधारणाअनुसार राज्यको संरचना र शब्दावलीसमेत परिमार्जन गर्नुपर्ने बताए।

‘अब दैवी प्रकोपको जमाना रहेन,’ खरेलले भने।