काठमाडौं । अभिनेता निखिल उप्रेतीको निर्माण तथा निर्देशनमा बनेको नेपाली चलचित्र ‘आचार्य’को नयाँ गीत ‘लै बरी लै’ सार्वजनिक गरिएको छ।

चलचित्र प्रदर्शनको तयारीमा रहेका बेला निर्माण पक्षले गीत सार्वजनिक गर्दै प्रचार अभियानलाई समेत तीव्र बनाएको हो।

गीतमा गौराङ्ग शेखर शर्मा र ज्योत्सना जव्दाको स्वर रहेको छ। युग भुसालको शब्द तथा संगीत रहेको गीतको म्युजिक प्रोडक्सन, मिक्सिङ र मास्टरिङ रूप महन्तले गरेका छन्।

गीतको भिडियोमा निखिल उप्रेती र सजिना श्रेष्ठलाई प्रस्तुत गरिएको छ। भिडियोमा यी दुई कलाकारबीचको प्रेम तथा सम्बन्धलाई केन्द्रमा राखिएको छ। आकर्षक लोकेसन, नृत्य र कलाकारको प्रस्तुतिले गीतलाई मनोरञ्जनात्मक बनाउने प्रयास गरिएको छ।

गीतको कोरियोग्राफी किरण थापाले गरेका हुन् भने छायांकन सौरव लामाले गरेका छन्। सिनेमाटोग्राफीमा ईश्वर सिंकेमन र हिमाल श्रेष्ठ पनि जोडिएका छन्।

निखिल उप्रेती प्रोडक्सन प्रालिको प्रस्तुतिमा बनेको ‘आचार्य’ असोज ९ गते अर्थात् सेप्टेम्बर २५ देखि प्रदर्शनमा आउने निर्माण पक्षले जनाएको छ।

चलचित्रमा निखिल उप्रेतीसँगै दीपकराज राना, प्रमोद अग्रहरी, रघुबाबु, रघु करुमाञ्ची, रोहित चौधरी, ध्रुव कोइराला, सजिना श्रेष्ठ, रञ्जित कोइराला, सरिता गवाली, अनुप तुलाधर, सुरेश कोहालीलगायत कलाकारको अभिनय छ।

फिल्मको कथा तथा लेखन निखिल उप्रेतीले गरेका हुन्। बन्देप्रसाद सम्पादक रहेको चलचित्रमा सौरव लामा, मन्नु बीके र नवराज कृष्ण थापाको छायांकन छ।

एक्सन निर्देशन शुक्रराज शाहको छ भने संगीत निर्देशन युग भुसालले गरेका छन्। कलरिस्ट राजेन्द्र मोक्तान र ब्याकग्राउन्ड म्युजिक स्कोर कालाचरणको रहेको छ।

चलचित्रमा किरण थापा र गम्भीर विष्टको कोरियोग्राफी तथा लुजा राज भण्डारी, समीर मियाँ, सत्यम राना र अनुपम शाहको भीएफएक्स सुपरभिजन रहेको निर्माण पक्षले जनाएको छ।

कृष्ण भट्टराई निर्माता र मिथिलेश तिवारी कार्यकारी निर्माता रहेको ‘आचार्य’को टिजर तथा ट्रेलर सन्देश शाहले तयार पारेका छन्। अनुपम शाह एसोसिएट निर्देशकका रूपमा रहेका छन्।

नयाँ गीत सार्वजनिक भएसँगै प्रदर्शनको मिति नजिकिँदै गरेको ‘आचार्य’को प्रचार अभियानले पनि गति लिएको छ।