काठमाडौं । इन्द्रजात्राका लागि आवश्यक लिङ्गो काभ्रेको नाला वनबाट काठमाडौं ल्याइएको छ।

इन्द्रजात्राको मुख्य प्रतीकका रूपमा लिइने लिङ्गोलाई परम्परागत तथा धार्मिक विधिअनुसार पूजा गरी छनोट गरिएको रूखबाट तयार पारिन्छ। सोही रूख काटेर तयार गरिएको लिङ्गोलाई मंगलबार सडकमार्ग हुँदै तानेर काठमाडौं ल्याइएको हो।

नेपाल भाषामा लिङ्गोलाई ‘यःसिं’ भनिन्छ। नाला वनबाट ल्याइएको लिङ्गोलाई आवश्यक विधि पूरा गरेपछि हनुमानढोका दरबार क्षेत्रस्थित कालभैरवको मूर्तिअगाडि ठड्याउने परम्परा छ।

लिङ्गो ठड्याएर इन्द्रध्वजोत्थान गरेपछि इन्द्रजात्राको औपचारिक सुरुवात हुने धार्मिक मान्यता छ।

इन्द्रजात्राको लिङ्गोका लागि रूख छनोट गर्ने परम्परा पनि विशेष धार्मिक विधिसँग जोडिएको छ। नाला क्षेत्रमा वनयात्रा गरी पूजा गरेपछि निश्चित विधि पूरा गरेर लिङ्गोका लागि उपयुक्त रूख छनोट गर्ने चलन छ।

पुरानो परम्पराअनुसार विशेष पूजा गरिएको बोका जंगलमा छाड्दा उसले छोएको रूखलाई समेत लिङ्गोका लागि छनोट गर्ने गरिएको संस्कृतिसँग जोडिएका जानकारहरू बताउँछन्।

नाला वनबाट काठमाडौंसम्म लिङ्गो तानेर ल्याउने परम्परा आफैँमा इन्द्रजात्राको महत्वपूर्ण सांस्कृतिक पक्ष हो।

काभ्रेबाट भक्तपुर हुँदै भोटाहिटी, असन र इन्द्रचोक पार गरेर लिङ्गो हनुमानढोका पुर्‍याइन्छ। लिङ्गो ल्याउने क्रममा बाटोभरि सर्वसाधारणको भीड लाग्ने गर्छ।

काठमाडौंको सांस्कृतिक पहिचानसँग जोडिएको इन्द्रजात्रामा लिङ्गो ल्याउनेदेखि ठड्याउनेसम्मका हरेक प्रक्रिया धार्मिक तथा सांस्कृतिक विधिअनुसार सम्पन्न गरिन्छ।