काठमाडौं । नेपाली कांग्रेसका निवर्तमान सभापति शेरबहादुर देउवाले पार्टीका नेता तथा कार्यकर्तालाई संस्थापन पक्षको महाधिवेशनमा सहभागी नहुन आग्रह गरेका छन्।

मंगलबार अपिल जारी गर्दै देउवाले पार्टीको विधि, विधान, पद्धति र परम्परा तथा केन्द्रीय समितिका निर्णयविपरीत विशेष महाधिवेशन आयोजना गरिएको दाबी गरेका छन्। उनले उक्त विशेष महाधिवेशनबाट बनेको समूहले आयोजना गर्ने महाधिवेशनमा सहभागी नहुन पार्टी पंक्तिलाई आग्रह गरेका हुन्।

विशेष महाधिवेशनको वैधतासम्बन्धी मुद्दा सर्वोच्च अदालतमा विचाराधीन रहेको उल्लेख गर्दै देउवाले अदालतबाट अन्तिम फैसला आउनुअघि त्यससँग सम्बन्धित महाधिवेशन प्रक्रिया अघि बढाउनु कानुनी र संवैधानिक मान्यताविपरीत हुने बताएका छन्।

उनका अनुसार सर्वोच्च अदालतको पूर्ण इजलासले समेत पुनरावलोकनको निस्सा प्रदान गरिसकेको छ। यसले विशेष महाधिवेशनको वैधतामाथि गम्भीर संवैधानिक तथा कानुनी प्रश्न कायमै रहेको उनको भनाइ छ।

देउवाले पार्टीका अनुभवी नेतृत्वबाट निर्वाचन जित्न नसकिने निष्कर्षका आधारमा विशेष महाधिवेशन गरिएको भन्ने दाबी पनि गरेका छन्। पछिल्लो निर्वाचन परिणामले त्यस्तो दाबीलाई गलत प्रमाणित गरिसकेको उनको जिकिर छ।

बहुसंख्यक नेता तथा कार्यकर्ताको सहभागिता र समर्थनबिना महाधिवेशन अघि बढाउनु पार्टीलाई कमजोर बनाउने प्रयास भएको देउवाले बताएका छन्। उनले अवैधानिक रूपमा भएको विशेष महाधिवेशनबाट आएको समूहले आयोजना गर्ने महाधिवेशनमा सहभागी नहुन सम्पूर्ण नेता–कार्यकर्तालाई आग्रह गरेका छन्।

देउवाले आफूलाई व्यक्तिगत रूपमा कुनै पद वा जिम्मेवारीको लोभ नरहेको पनि बताएका छन्। तर, देश र पार्टीले आफ्नो अनुभवको आवश्यकता महसुस गरेमा जीवनको अन्तिम समयसम्म जिम्मेवारी निर्वाह गर्न आफू तयार रहेको उनको भनाइ छ।

देशभरका महाधिवेशन प्रतिनिधिबाट विधिवत् सम्पन्न १४औँ महाधिवेशनबाट निर्वाचित सभापतिको हैसियतमा १५औँ महाधिवेशन सम्पन्न गरी पार्टीको नेतृत्व हस्तान्तरण गर्नु आफ्नो वैधानिक, राजनीतिक र नैतिक दायित्व भएको देउवाले उल्लेख गरेका छन्।

पार्टीलाई कमजोर बनाउने गतिविधि भइरहँदा आफू मौन बस्न नसक्ने बताउँदै उनले कांग्रेसका नेता-कार्यकर्ता, शुभेच्छुक तथा आम नागरिकलाई पार्टीभित्र देखिएको मतभेद अन्त्य गरी एकताबद्ध हुन आग्रह गरेका छन्।

उनले आगामी मंसिर २१, २२ र २३ गते हुने १५औँ महाधिवेशनलाई सफल बनाउन तयारीमा जुट्नसमेत सबैलाई आह्वान गरेका छन्।