काठमाडौं । प्रधानमन्त्री बालेन शाहसँग नेपालका लागि कार्यवाहक अमेरिकी राजदूत मेगन बोल्डिनले सिंहदरबारमा भेटवार्ता गरेकी छन्।

शिष्टाचार भेटका क्रममा प्रधानमन्त्री शाहले विपद्का बेला अमेरिकाले देखाएको ऐक्यबद्धता र सहयोगप्रति आभार व्यक्त गरे।

रसुवाको बाढीबाट नेपालीसँगै विदेशी नागरिकसमेत प्रभावित भएको जानकारी दिँदै उनले जलवायु परिवर्तनका कारण यस्ता विपद् बढ्दै गएको बताए।

शाहले जलवायुजन्य विपद्को जोखिम न्यूनीकरण र त्यसबाट हुने क्षति सम्बोधनका लागि अन्तर्राष्ट्रिय सहकार्य बलियो बनाउनुपर्नेमा जोड दिए। साथै, नेपालको पर्यटन विकास र सम्भावित अमेरिकी लगानीका विषयमा पनि छलफल भएको उनको सचिवालयले जनाएको छ।

भेटमा कार्यवाहक राजदूत बोल्डिनले रसुवा बाढीबाट भएको जनधनको क्षतिप्रति दुःख व्यक्त गर्दै पीडित परिवार तथा प्रभावित समुदायप्रति समवेदना प्रकट गरिन्।

उनले विपद्को यो कठिन समयमा नेपाल सरकार र नेपाली जनताप्रति अमेरिकी सरकारको ऐक्यबद्धता रहेको बताउँदै राहत, पुनःस्थापना र पुनर्निर्माणमा आवश्यक सहयोग तथा सहकार्य गर्न अमेरिका तयार रहेको जानकारी गराइन्।