काठमाडौं । देशको प्रशासनिक केन्द्र सिंहदरबारभित्रै बुधबार दुई गाडी ठोक्किएका छन्।

विज्ञान, प्रविधि तथा नवप्रवर्तन मन्त्रालयअगाडि संयुक्त राष्ट्र विकास कार्यक्रम (यूएनडीपी) को गाडीले रास्वपा सांसद नितिमा कार्की भण्डारीको गाडीमा ठक्कर दिएको हो।

यूएनडीपीको ६६–१–००१२ नम्बरको गाडीको ठक्करबाट सांसद भण्डारीको वाग्मती प्रदेश ०१–०२८ च ९००९ नम्बरको गाडीमा क्षति पुगेको छ।

सिंहदरबारजस्तो उच्च सुरक्षा क्षेत्रभित्रै भएको दुर्घटनापछि घटनाबारे सोधपुछ सुरु गरिएको छ। ट्राफिक प्रहरीका एसपी नरेश सुवेदीले दुर्घटनाबारे आवश्यक विवरण लिने काम भइरहेको जानकारी दिएका छन्।

दुर्घटना कसरी भयो भन्नेबारे प्रहरीले थप अनुसन्धान गरिरहेको छ।