काठमाडौं । नेकपा एमालेकी सांसद टुकाभद्रा हमालले बाढीपहिरोले तहसनहस बनेको रसुवाको शिक्षा क्षेत्र तत्काल सञ्चालनमा ल्याउन सरकारसँग माग गरेकी छन्।

प्रतिनिधिसभाको विशेष समयमा बोल्दै हमालले हालै रसुवाका विभिन्न प्रभावित क्षेत्रको स्थलगत अवलोकन गर्दा विद्यालय र विद्यार्थीको अवस्था निकै दयनीय पाएको बताइन्।

उनका अनुसार बाढीपहिरोका कारण धेरै विद्यालय पूर्ण रूपमा क्षतिग्रस्त भएका छन्। कतिपय स्थानीय तह र शिक्षकसमेत सम्पर्कविहीन हुँदा बालबालिकाको विद्यालयसम्मको पहुँच नै टुटेको उनले बताइन्।

हमालले विपद्का कारण विद्यालय बन्द भएको विषयलाई सामान्य रूपमा लिन नहुने बताइन्। लामो समयसम्म पढाइ रोकिने हो भने त्यसको असर बालबालिकाको सिकाइसँगै मानसिक अवस्थामासमेत पर्ने उनको भनाइ छ।

‘एउटा बच्चाको विद्यालय बन्द हुनु भनेको केवल दिनको कक्षा छुट्नु होइन, उसको सिकाइ प्रक्रिया र भविष्य दुवै प्रभावित हुनु हो,’ उनले भनिन्।

क्षतिग्रस्त विद्यालय कहिले पुनर्निर्माण हुन्छ र विद्यालय सञ्चालनमा नआएसम्म बालबालिकाका लागि वैकल्पिक सिकाइको व्यवस्था के हुन्छ भन्ने प्रश्नसमेत उनले सरकारसमक्ष उठाइन्।

हमालले विपद् व्यवस्थापनलाई उद्धार र राहतमा मात्र सीमित गर्न नहुने बताइन्। प्रभावित क्षेत्रमा शिक्षा, स्वास्थ्य, सडक, खाद्यान्न तथा अन्य आधारभूत सेवा पुनःस्थापना गर्ने दीर्घकालीन योजना आवश्यक रहेको उनको भनाइ छ।

बाढीपहिरोका कारण पर्यटन तथा होटल व्यवसायसमेत प्रभावित भएको उल्लेख गर्दै उनले सडक र विद्यालय सञ्चालनसँगै स्थानीय अर्थतन्त्रलाई चलायमान बनाउने वातावरण बनाउन सरकारको ध्यानाकर्षण गराइन्।

‘राज्यले सडक, विद्यालय र व्यवसाय सुचारु गर्ने वातावरण नबनाउने हो भने नागरिकहरू आर्थिक रूपमा नै संकटमा पर्छन्,’ हमालले भनिन्।