काठमाडौं । राष्ट्रिय प्रजातन्त्र पार्टी (राप्रपा)का संसदीय दलका नेता ज्ञानेन्द्र शाहीले सरकारले राजदूत सिफारिस गर्दा आफैंले बनाएको मापदण्ड पालना नगरेको आरोप लगाएका छन्।

सोमबार प्रतिनिधिसभाको बैठकमा बोल्दै शाहीले परराष्ट्र मन्त्रालयले तयार पारेको राजदूत नियुक्तिसम्बन्धी मापदण्ड र प्रस्तावित राजदूतहरूको पृष्ठभूमिबीच मेल नदेखिएको दाबी गरेका हुन्।

उनका अनुसार मापदण्डको १० नम्बर बुँदामा अन्तर्राष्ट्रिय वा विदेशी सहयोगबाट वित्तपोषित गैरसरकारी संस्थामा कार्यरत व्यक्ति राजदूतका लागि योग्य नहुने व्यवस्था छ।

त्यस्तै, कुनै विदेशी राज्यबाट तलबसहितको पदमा नियुक्त भएको भए उक्त पद छाडेको कम्तीमा १० वर्ष पूरा भएको हुनुपर्ने व्यवस्था रहेको शाहीले बताए।

सरकारले हालै १३ देशका लागि राजदूत सिफारिस गरेको प्रसंग उठाउँदै शाहीले केही प्रस्तावित राजदूतको पृष्ठभूमि सरकारी मापदण्डसँग मेल नखाने दाबी गरे।

उनले अमेरिकाका लागि प्रस्तावित चिरञ्जीवी जंग थापा अक्सफामको एसियाली क्षेत्रीय सुरक्षा सल्लाहकारका रूपमा काम गरेको, स्पेनका लागि प्रस्तावित प्राप्ति शेरचन विश्व बैंक समूहअन्तर्गतको आईएफसीमा कार्यरत रहेको तथा जर्मनीका लागि प्रस्तावित सरु जोशीले यूएन वुमेनलगायत अन्तर्राष्ट्रिय संस्थामा काम गरेको विवरण रहेको बताए।

त्यस्तै, ओमानका लागि प्रस्तावित पद्माक्षी राणा अन्तर्राष्ट्रिय विकास साझेदार संस्थासँगको सहकार्यमा रहेको, दक्षिण कोरियाका लागि प्रस्तावित प्रा. डा. संगम श्रेष्ठले एसियन इन्स्टिच्युट अफ टेक्नोलोजीलगायतका संस्थासँग काम गरेको तथा साउदी अरेबियाका लागि प्रस्तावित गिरीबहादुर सुनारले विश्व बैंक र एसियाली विकास बैंक समर्थित परियोजनामा काम गरेको विवरण रहेको शाहीको भनाइ छ।

‘म यहाँ कुनै व्यक्तिको व्यक्तिगत योग्यता वा क्षमतामाथि प्रश्न उठाइरहेको छैन। प्रश्न सरकार आफैंले बनाएको मापदण्डको कार्यान्वयनमाथि हो,’ शाहीले भने।

सरकारले मापदण्ड बनाउने तर कार्यान्वयन नगर्ने हो भने त्यसलाई सुशासन भन्न नसकिने उनको टिप्पणी थियो।

युवाहरूले परिवर्तन, विधिको शासन, सुशासन, पारदर्शिता र जवाफदेहिताका लागि बलिदान दिएको उल्लेख गर्दै शाहीले सरकारको कार्यशैलीमा पनि त्यसको प्रभाव देखिनुपर्ने बताए।

‘हिजोका सरकार र आजको सरकारबीच फरक के हो? फरक केवल अनुहार र कुर्सीको हुनुहुँदैन। फरक शासन गर्ने संस्कारमा, विधिको पालना गर्ने व्यवहारमा र जनताप्रतिको जवाफदेहितामा देखिनुपर्छ,’ उनले भने।