काठमाडौं। उद्योगमन्त्री दीपक कुमार साहले खाना पकाउने ग्यासको अभाव तत्काल हटाउन सरकारले काम गरिरहेको बताएका छन्।

सोमबार प्रतिनिधिसभाको बैठकमा बोल्दै मन्त्री साहले ग्यास आपूर्ति सहज बनाउन मन्त्रालयले अल्पकालीन, मध्यकालीन र दीर्घकालीन रणनीति अघि बढाएको जानकारी दिए।

उनका अनुसार ग्यास समस्या समाधानका लागि मन्त्रालयभित्र आन्तरिक समिति गठन गरिएको छ। दीर्घकालीन समाधानका लागि आवश्यक पूर्वाधार नीति बनाउन राष्ट्रिय योजना आयोगलाई समेत पत्राचार गरिएको छ।

मन्त्रालयले ग्यास अभावको कारण पहिचान गर्न ‘फिसबोन डाइग्राम’ नामक प्राविधिक विश्लेषण उपकरण प्रयोग गरेको साहले बताए।

अध्ययनले ग्यास अभावमा एउटा मात्र कारण नभई आपूर्ति, कानुन, वितरण प्रणाली, जनशक्ति, सामाजिक तथा अन्तर्राष्ट्रिय पक्ष जोडिएको देखाएको उनको भनाइ छ।

आयातमा निर्भरता, अन्तर्राष्ट्रिय बजारमा मूल्यवृद्धि, भण्डारण र रिफिलिङको समस्या, डिलर तथा सेवा केन्द्रको असमान वितरण र खाली सिलिन्डर भर्न हुने ढिलाइले माग र आपूर्तिमा असन्तुलन ल्याएको मन्त्रालयको निष्कर्ष छ।

कालोबजारी, डिजिटल ट्र्याकिङ प्रणालीको अभाव र अन्तरनिकाय समन्वयको कमीले समस्या थप जटिल बनाएको पनि मन्त्री साहले बताए।

उनले ग्यास संकटलाई केवल कति सिलिन्डर आयो भन्ने हिसाबमा मात्र नहेरी लोडिङदेखि उपभोक्ताको भान्सासम्म पुग्ने समय, रिफिलिङ क्षमता, मूल्य र सिलिन्डर पहिचानलाई एउटै प्रणालीमा जोडेर अध्ययन भइरहेको बताए।

तत्काल आपूर्ति सहज बनाउन सरकारले अवरुद्ध कृष्णभीर सडकखण्ड मर्मत गरी सञ्चालनमा ल्याएको साहले जानकारी दिए।

बजारको माग धान्न हाल नियमित रूपमा आइरहेको दैनिक १०० बुलेट ग्यासलाई बढाएर १६० बुलेट पुर्‍याउने विषयमा सरकारले कूटनीतिक पहलसमेत अघि बढाएको उनले बताए।