काठमाडौं। इटालीका प्रधानमन्त्री जर्जिया मेलोनीले विद्यालयमा बुर्का, नकाबलगायत अनुहार ढाक्ने पोसाकमा प्रतिबन्ध लगाउने प्रस्ताव अघि सारेकी छन्।

रोममा आइतबार आफ्नै पार्टी ब्रदर्स अफ इटालीको युवा संगठनको कार्यक्रममा बोल्दै मेलोनीले प्रस्तावित व्यवस्था छिट्टै मन्त्रिपरिषद्मा पेस गर्ने बताइन्।

प्रस्तावमा विद्यालयका प्रत्येक कक्षामा विदेशी विद्यार्थीको संख्या सीमित गर्ने व्यवस्था पनि समेटिनेछ। विद्यालयमा एकीकरणमा गम्भीर समस्या देखिएका विदेशी विद्यार्थीका अभिभावकलाई इटालियन भाषा सिक्नुपर्ने व्यवस्था ल्याउने तयारीसमेत गरिएको उनले बताइन्।

मेलोनीले इटालीमा बस्न आउने व्यक्तिले देशको भाषा, संस्कृति र कानुनको सम्मान गर्नुपर्ने बताइन्। विद्यालयमा प्रभावकारी एकीकरण र लैंगिक समानतामा जोड दिँदै उनले कुनै पनि परम्पराका नाममा युवतीलाई अनुहार ढाक्न बाध्य पार्न नहुने धारणा राखिन्।

फोन्डाजियोन आईएसएमयूका अनुसार इटालीका विद्यालयमा इटालियन नागरिक नभएका विद्यार्थी कुल विद्यार्थीको ११.६ प्रतिशत छन्।

तर प्रस्तावित व्यवस्था अहिलेसम्म घोषणाको चरणमै छ। त्यसलाई कानुनी रूपमा कार्यान्वयन गर्न मन्त्रिपरिषद् र अन्य आवश्यक प्रक्रिया पूरा गर्न बाँकी रहेको जनाइएको छ।