काठमाडौं। नेकपा एमालेकी सांसद गंगादेवी श्रेष्ठले रास्वपा सभापति रवि लामिछानेमाथि सर्वोच्च अदालतमा आगजनी गर्न निर्देशन दिएको आरोप लगाएपछि रास्वपाले नियमापत्ति जनाएको छ।

प्रतिनिधिसभाको बैठकमा बोल्दै सांसद श्रेष्ठले गत भदौ २३ र २४ गते सर्वोच्च अदालतमा भएको आगजनीको विषय उठाइन्। उनले लामिछानेको निर्देशनमा अदालतका फाइल र कोठा लक्षित गरी आगजनी गरिएको आरोप लगाइन्।

श्रेष्ठले जेनजी आन्दोलनअघि नै रास्वपा सभापति तथा तत्कालीन गृहमन्त्री लामिछानेले कुन अदालतमा कुन फाइल र कुन नम्बरको कोठामा ती फाइल छन् भन्नेबारे निर्देशन दिएको दाबी गरिन्।

‘सर्वोच्च अदालत जलाउँदा अहिले जल्न बाँकी कुन-कुन फाइल रहेछन् र कोठा छानिछानी फेरि आगो लाग्दै छ। त्यो के फाइल थियो र पटक-पटक जल्छ ?’ उनले प्रश्न गरिन्।

उनले सर्वोच्चमा भएका आगजनीका घटनामा कुन फाइल किन जलाइयो भन्ने विषयमा संसदीय छानबिन समिति गठन गर्न माग गरिन्।

श्रेष्ठको आरोपपछि रास्वपा सांसद लालविक्रम थापाले नियमापत्ति जनाए।

उनले पार्टी सभापति लामिछानेलाई जोडेर अफवाह फैलाउने काम भएको भन्दै आपत्ति जनाए। श्रेष्ठको अभिव्यक्ति संसद्को रेकर्डबाट हटाउन उनले माग गरे।

सांसद श्रेष्ठले भने सरकारले न्यायपालिकामाथि निरन्तर प्रहार गरिरहेको आरोप लगाउँदै आएकी छन्।

रास्वपाले भने लामिछानेलाई सर्वोच्च अदालतको आगजनीसँग जोडेर लगाइएको आरोप अस्वीकार गर्दै त्यसलाई संसदीय अभिलेखबाट हटाउन माग गरेको हो।