काठमाडौं । नेपाली टी-२०आई क्रिकेट टोलीका कप्तान दीपेन्द्रसिंह ऐरी अन्तर्राष्ट्रिय क्रिकेट परिषद् (आईसीसी) को टी–२०आई अलराउन्डर वरियतामा एक स्थान तल झरेका छन्।

आईसीसीले मंगलबारसम्मका खेललाई आधार बनाएर बुधबार सार्वजनिक गरेको नयाँ वरियतामा दीपेन्द्र तेस्रोबाट चौथो स्थानमा पुगेका हुन्। उनको रेटिङ अंक भने २५६ नै कायम छ।

नेपालले पछिल्लो समय कुनै टी-२०आई खेल नखेलेकाले दीपेन्द्रको वरियतामा प्रत्यक्ष परिवर्तन भएको होइन। उनीभन्दा तल रहेका इंग्ल्यान्डका विल ज्याक्सले श्रीलंकाविरुद्धको हालै सम्पन्न टी-२०आई शृङ्खलामा गरेको प्रदर्शनका आधारमा अंक सुधार गरेपछि तेस्रो स्थानमा उक्लिएका हुन्।

नेपालले अब शुक्रबारदेखि एसियन गेम्सअन्तर्गत क्रिकेट प्रतियोगितामा प्रतिस्पर्धा गर्दैछ। एसियन गेम्समा दीपेन्द्रसहित नेपाली खेलाडीको प्रदर्शनले आगामी टी-२०आई वरियतामा समेत प्रभाव पार्न सक्नेछ।

आईसीसीको नयाँ अलराउन्डर वरियताको शीर्ष स्थानमा जिम्बाबेका सिकन्दर राजा कायमै छन्। उनको रेटिङ ३२१ रहेको छ। पाकिस्तानका सायम अयुब २९२ रेटिङसहित दोस्रो स्थानमा छन्।

यस्तै, विल ज्याक्स तेस्रो स्थानमा उक्लिँदा दीपेन्द्र २५६ अंकसहित चौथो स्थानमा छन्। अफगानिस्तानका अजमतुल्लाह ओमरजाइ पाँचौँ स्थानमा रहेका छन्।