काठमाडौं । सेन्चुरी स्पाइसेज नेपाल प्रिमियर लिग (एनपीएल)को फ्रेन्चाइज टोली काठमान्डु गोर्खाजको प्रायोजक बनेको छ।

एनपीएलको तेस्रो संस्करणका लागि सेन्चुरी स्पाइसेज र काठमान्डु गोर्खाजबीच मंगलबार प्रायोजन सम्झौता भएको हो। सम्झौताअनुसार दुगड स्पाइसेज एन्ड फुड प्रडक्ट्स प्रालिअन्तर्गतको सेन्चुरी स्पाइसेजको लोगो टोलीको जर्सीको छाती र हेल्मेटमा राखिनेछ।

सम्झौतापछि काठमान्डु गोर्खाजका कार्यकारी निर्देशक अनुभव सिरोहियाले नेपाली बजारमा स्थापित ब्रान्डलाई टोलीसँग जोड्न पाउँदा खुसी लागेको बताए।

त्यस्तै, दुगड स्पाइसेज एन्ड फुड प्रडक्ट्स प्रालिका प्रबन्ध निर्देशक आदित्य दुगडले ब्रान्ड र खेलकुदबीचको सहकार्य गर्न पाउँदा उत्साहित रहेको बताए।

नेपाल क्रिकेट संघ (क्यान)को आयोजनामा एनपीएलको तेस्रो संस्करण कात्तिक ९ गतेदेखि सुरु हुने तालिका छ। प्रतियोगितामा आठ फ्रेन्चाइज टोली सहभागी हुँदैछन्।

 काठमान्डु गोर्खाजले यसअघि नै अस्ट्रेलियाका पूर्वकप्तान तथा स्टार ब्याटर डेभिड वार्नरलाई तेस्रो संस्करणका लागि अनुबन्ध गरिसकेको छ।

साथै, वार्नर एनपीएल खेल्न आउने अहिलेसम्मकै चर्चित विदेशी खेलाडीमध्ये एक हुन्।