पाँचथर । ‘सनातन धर्म, संवैधानिक राजसंस्था र प्रजातन्त्र’को पक्षमा काम गर्ने विश्वासिलो राजनीतिक शक्तिका रूपमा जय नेपाल पार्टीलाई अघि बढाउने तयारी गरिएको छ।

पार्टीका केन्द्रीय सदस्य तथा सचिवालय प्रमुख सगुन सुन्दर लावतीले देशहित चाहने सबै शक्ति, समूह र व्यक्तिलाई समेटेर पार्टी जनतामाझ जाने बताएका छन्।

मंगलबार फिदिममा आयोजित भेलालाई सम्बोधन गर्दै लावतीले नेपालीबीचको एकता, राष्ट्रिय गौरव, सामाजिक सद्भाव र सहिष्णुतालाई पार्टीले प्राथमिकतामा राख्ने बताए।

‘देशलाई माया गर्ने, देशको हित चाहने सबै शक्ति, समूह र व्यक्तिलाई समेटेर जय नेपाल पार्टी जनतामाझ जानेछ,’ उनले भने, ‘नेपाली नेपालीबीचको एकता, राष्ट्रिय गौरवको निरन्तरता, सामाजिक सद्भाव र सहिष्णुतालाई सर्वोपरी मानेर हामी क्रियाशील रहनेछौं।’

भेलाले पार्टीका केन्द्रीय सदस्य राजकुमार जोशीलाई पाँचथर जिल्ला कार्यसमितिको तदर्थ सभापति चयन गरेको छ।

३१ सदस्यीय जिल्ला कार्यसमितिको उपसभापतिमा कमलकुमार राई र भीम आचार्य तथा सचिवमा रोसिना बोहरा चयन भएका छन्। सहसचिवमा योगेन्द्र सिगु र सबिना वजी चयन भएका छन्।

जिल्ला सदस्यमा राजभक्त आङदेङबे, संजीव जोशी, धनबहादुर विक, राजकुमार सम्बाहाम्फे, मदनकुमार बोहरा, मिना गदाल, शिवकला लावती, नरेन्द्र लावती, मदन चाम्लिङ, रिमला जोशी, राम लावती, तीर्थ तामाङ, होम मगर, ऋतुवर्ण लिम्बु र विष्णु श्रेष्ठ चयन भएका छन्।

भेलाले जिल्लाका विभिन्न स्थानीय तहका सभापतिसमेत चयन गरेको छ।

याङवरक गाउँपालिकामा चरीमाया योङहाङ, फालेलुङमा राम तामाङ र नरेन्द्र सिगु, फिदिम नगरपालिकामा नन्द लावती, तुम्बेवामा देवीधर्म खड्का, कुम्मायकमा चन्द्र लावती, फाल्गुनन्दमा मोती आङदेङबे र मिक्लाजुङमा रवीन राईलाई सभापतिको जिम्मेवारी दिइएको छ।

प्रदेश निर्वाचन कार्यसमिति ‘क’को सभापतिमा गमबहादुर सिगु र ‘ख’को सभापतिमा रोशन घिमिरे चयन भएका छन्। यी पदाधिकारी जिल्ला कार्यसमितिका पदेन सदस्य रहने बताइएको छ।

केन्द्रीय सम्मानित सल्लाहकार समितिका सदस्य क्या. जसबहादुर खेवाङको अध्यक्षता तथा केन्द्रीय सदस्य एवं सचिवालय प्रमुख लावतीको उपस्थितिमा भएको भेलाले जिल्ला सम्मानित सल्लाहकार समिति पनि गठन गरेको छ।

टठबहादुर घिमिरेको संयोजकत्वमा गठन गरिएको समितिमा नरबहादुर लावती र दलबहादुर समाल सदस्य छन्।

जय नेपाल पार्टीले पाँचथरमा जिल्ला नेतृत्वसँगै स्थानीय तह र प्रदेश निर्वाचन क्षेत्रसम्म संगठन विस्तार थालेको जनाएको छ।