काठमाडौं। प्रधानमन्त्री वालेन्द्र शाह (बालेन) अमेरिका उडेका छन्। संयुक्त राष्ट्रसंघको ८१औँ महासभामा सहभागी हुन उनी मंगलबार साँझ न्यूयोर्कतर्फ प्रस्थान गरेका हुन्।

प्रधानमन्त्री देशबाहिर गएसँगै सरकारको कार्यकारी जिम्मेवारी अर्थमन्त्री डा. स्वर्णिम वाग्लेको काँधमा आएको छ। राष्ट्रपति रामचन्द्र पौडेलले प्रधानमन्त्री शाहको सिफारिसमा वाग्लेलाई कार्यवाहक प्रधानमन्त्री तोकेका हुन्।

वाग्ले कार्यवाहक प्रधानमन्त्री बनेसँगै उनीमाथि केही वर्षअघि लागेको विवादास्पद आरोप फेरि चर्चामा आएको छ।

राष्ट्रिय स्वतन्त्र पार्टी (रास्वपा)का तत्कालीन महामन्त्री मुकुल ढकालले २०८१ सालमा वाग्लेमाथि नेपाललाई भारतको राज्य बनाउने प्रस्ताव गरेको आरोप लगाएका थिए। ढकालले एक टेलिभिजन अन्तर्वार्तामा भारतीय पक्षसँगको भेटपछि वाग्लेले यस्तो प्रस्ताव राखेको दाबी गरेका थिए।

यो आरोप भने वाग्लेले अस्वीकार गर्दै आएका छन्। संसद्मा समेत उक्त विषय उठेपछि वाग्लेले आफ्नो भनाइलाई तोडमोड गरिएको दाबी गरेका थिए। उनले नेपालको स्वतन्त्रता, सार्वभौमिकता र स्वाभिमानप्रति आफू प्रतिबद्ध रहेको बताएका थिए।

आरोप र त्यसको खण्डनबीच अहिले उनै वाग्ले केही दिनका लागि सरकारको कार्यकारी नेतृत्वमा पुगेका छन्।

बालेन अमेरिका उडेपछि सिंहदरबारको कार्यकारी कमान वाग्लेको हातमा आएको हो। उनले प्रधानमन्त्रीको अनुपस्थितिमा सरकारका नियमित कामकारबाही अघि बढाउनेछन्।

प्रधानमन्त्री शाह संयुक्त राष्ट्रसंघको महासभामा नेपालको प्रतिनिधित्व गर्न न्यूयोर्क पुगेका हुन्। उनले असोज ८ गते अर्थात् सेप्टेम्बर २४ मा महासभालाई सम्बोधन गर्ने कार्यक्रम छ।

शाह असोज १० गते नेपाल फर्किने तालिका छ। त्यसअघिसम्म सरकारको दैनिक प्रशासनिक तथा कार्यकारी जिम्मेवारी वाग्लेले सम्हाल्नेछन्।

यसरी केही दिनका लागि प्रधानमन्त्रीको कुर्सीको जिम्मेवारी त्यही वाग्लेको काँधमा आएको छ।

जसलाई केही वर्षअघि नेपाललाई भारतमा गाभ्ने प्रस्ताव गरेको आरोप लागेको थियो।