पाल्पा । पाल्पाका छुट्टाछुट्टै स्थानमा पहिरोले घर पुरिँदा एक जनाको मृत्यु भएको छ भने तीन जना बेपत्ता भएका छन्।

माथागढी गाउँपालिका-२ रुप्सेमा गएराति पहिरोले घर पुरिँदा ७५ वर्षीय शेरबहादुर चिदी घाइते भएका थिए। उद्धार गरी उपचारका लागि स्वास्थ्यचौकी पुर्‍याइए पनि चिकित्सकले उनलाई मृत घोषणा गरेको वडाध्यक्ष वोमबहादुर ठाडामगरले जानकारी दिए।

पहिरोले घर पुरिँदा चिदीकी श्रीमती घरमा थिइन्। तर, घटना हुने समयमा उनी शौच गर्न गएका कारण सकुशल रहेको वडाध्यक्ष ठाडामगरले बताए।

यस्तै, अविरल वर्षाका कारण माथागढी गाउँपालिका–३ भैसकट्टामा दुईवटा घर पहिरोले पुरिएका छन्। पहिरोमा परी तीन जना बेपत्ता भएको प्रहरीले जनाएको छ।

प्रहरीका अनुसार आइतबार बिहान करिब साढे ४ बजे लिलबहादुर घर्ती मगरको घरमाथिबाट पहिरो खसेको थियो। पहिरोले घर पुरिँदा ७५ वर्षीय लिलबहादुर घर्ती मगर, उनकी १७ वर्षीया छोरी दिना घर्ती मगर र छिमेकी मोतिलाल घर्तीकी १५ वर्षीया छोरी झरना घर्ती बेपत्ता भएका छन्।

बेपत्ताको खोजी तथा उद्धारका लागि जनप्रतिनिधिसहित नेपाली सेना, सशस्त्र प्रहरी र नेपाल प्रहरीको टोली घटनास्थल पुगेको वडा अध्यक्ष तेजबहादुर घर्तीमगरले जानकारी दिए।

ठूलो पहिरो खसेकाले उद्धार तथा खोजी कार्यमा समय लाग्ने माथागढी गाउँपालिकाका अध्यक्ष यमबहादुर चिदीले बताएका छन्। घटनाको थप विवरण आउन बाँकी रहेको प्रहरीले जनाएको छ।