काठमाडौं । लगातारको वर्षाका कारण कुलेखानी जलाशयको पानीको सतह बढेर १ हजार ५२६.५० मिटर पुगेको छ।

कुलेखानी प्रथम आयोजनाका प्रमुख प्रह्लाद राउतका अनुसार आइतबार दिउँसो २ बजेसम्म जलाशयको पानीको सतह उक्त उचाइमा पुगेको हो। जलाशयमा अधिकतम १ हजार ५३० मिटरसम्म पानी भण्डारण गर्न सकिन्छ।

हाल आयोजना क्षेत्रमा वर्षा रोकिएको छ। जलाशयको पानीको सतह सुरक्षित तहमा राख्न कुलेखानी जलविद्युत् केन्द्रलाई चौबीसै घण्टा पूर्ण क्षमतामा सञ्चालन गरिएको छ।

साथै,जलाशयको सतह थप बढ्न सक्ने सम्भावनालाई ध्यानमा राख्दै आवश्यक सुरक्षात्मक उपाय अपनाउन सम्पूर्ण संयन्त्र तयारी अवस्थामा राखिएको प्राधिकरणले जनाएको छ।