काठमाडौं । विपक्षी दल राष्ट्रिय प्रजातन्त्र पार्टी (राप्रपा) ले पूर्वप्रधानन्यायाधीश चोलेन्द्र शमशेर जबरालाई मध्यरातमा पक्राउ गरिएको घटनालाई राज्य संयन्त्रको दुरुपयोग भएको बताएको छ।

प्रतिनिधिसभाको सोमबारको बैठकमा आकस्मिक समयमा बोल्दै राप्रपा सांसद भरत गिरीले पूर्वप्रधानन्यायाधीशजस्तो सम्मानित पदमा बसेका व्यक्तिलाई कानुनी प्रक्रिया मिचेर पक्राउ गरिएको भन्दै सरकारको कार्यशैलीमाथि प्रश्न उठाए। उनले यस्तो घटनाले मुलुकमा विधिको शासन र लोकतान्त्रिक मूल्य-मान्यतामाथि प्रश्न खडा गरेको बताए।

‘सरकारले पूर्वप्रधानन्यायाधीश जबरालाई जसरी मध्यरातमा घरबाटै पक्राउ गर्‍यो, यो राज्य संयन्त्रको दुरुपयोगको उदाहरण हो। यस्तो शैलीले लोकतन्त्र र मानव अधिकारको मर्ममाथि प्रहार गरेको छ,’ गिरीले भने।

गिरीले आफूहरू कानुन र विधिको शासनको पक्षमा रहेको उल्लेख गर्दै कानुनको आडमा राजनीतिक प्रतिशोध साँध्ने कार्य स्वीकार्य नहुने बताए। राज्यले शक्ति प्रयोग गर्दा पारदर्शिता र कानुनी प्रक्रिया पालना गर्नुपर्ने उनको भनाइ थियो।

‘हामी कानुन मान्छौँ, तर कानुनको आडमा गरिने प्रतिशोधको राजनीति स्वीकार्य छैन। राज्यले शक्ति प्रयोग गर्दा पारदर्शिता अपनाउनुपर्छ,’ उनले भने।

गिरीले वर्तमान सरकार गठन भएयता संवैधानिक अंगका प्रमुख, पूर्वप्रधानमन्त्री तथा पूर्वपदाधिकारीलाई लक्षित गरी पक्राउका घटना दोहोरिरहेको दाबी गरे। उनले रातिको समयमा पूर्वप्रधानमन्त्री, पूर्वपदाधिकारी र पूर्वप्रधानन्यायाधीशलाई पक्राउ गर्ने शैलीप्रति समेत प्रश्न उठाए।

‘कहिले पूर्वप्रधानमन्त्री, कहिले पूर्वपदाधिकारी त कहिले पूर्वप्रधानन्यायाधीश राति सुतिरहेको बेला उठाउने र हतकडी लगाउने काम सरकारको नियमित कार्यतालिका जस्तै भएको छ। के यो लोकतान्त्रिक सरकारको काम हो ?’ गिरीले प्रश्न गरे।