काठमाडौं । पूर्वप्रधानन्यायाधीश चोलेन्द्र शम्शेर जबरालाई प्रहरी नियन्त्रणमा राखिएको विषयमा विपक्षी नेकपाले संसदमा प्रश्न उठाएको छ।

प्रतिनिधिसभाको सोमबारको बैठकमा नेकपा प्रमुख सचेतक युवराज दुलालले जबरा पक्राउ पर्नुको कारण र त्यसको कानुनी आधारबारे सरकारले संसदमा जवाफ दिनुपर्ने बताएका हुन्।

दुलालले वर्तमान सरकार गठन भएयता पूर्वप्रधानमन्त्रीदेखि विशिष्ट व्यक्तिसम्मलाई पक्राउ गर्ने र अदालतबाट छुट्ने क्रम देखिएको भन्दै यसको कारण स्पष्ट गर्न सरकारसँग माग गरे।

उनले पूर्वप्रधानन्यायाधीशलाई ‘सुरक्षा थ्रेट’ का कारण नियन्त्रणमा लिइएको भनिए पनि सुरक्षा थ्रेट हुने व्यक्तिलाई पक्राउ गर्ने कि सुरक्षा थ्रेट दिने व्यक्तिलाई भन्ने प्रश्न उठाए।

‘पूर्वप्रधानन्यायाधीशलाई सुरक्षा थ्रेट भनियो, जेन-जीबाट सुरक्षा थ्रेट भन्ने समाचारहरू आए । गिरफ्तार सुरक्षा थ्रेट दिनेलाई गरिन्छ कि सुरक्षा थ्रेट हुनेलाई ? यसको जवाफ सरकारले दिनुपर्छ,’ दुलालले भने।

उनले सरकार गठन भएकै दिन पूर्वप्रधानमन्त्रीलाई रातभर घर घेरा हालेर पक्राउ गरिएको र अहिले पूर्वप्रधानन्यायाधीशलाई पक्राउ गरी १२ घण्टापछि छाडिएको भन्दै सरकारको कार्यशैलीमाथि प्रश्न गरे। जबरालाई अपराध अनुसन्धान कार्यालयमा राखेर अन्त्य हुने सुरक्षा थ्रेट के हो र त्यो सुरक्षा थ्रेट कोबाट थियो भन्ने पनि उनले प्रश्न गरे।

‘सरकार गठन भएकै दिन पूर्वप्रधानमन्त्रीलाई रातभर घर घेरा हालेर पक्राउ गरियो । आज पूर्वप्रधानन्यायाधीशलाई पक्राउ गरियो र बिना कारण १२ घण्टापछि छोडियो,’ उनले भने, ‘अपराध अनुसन्धान कार्यालयमा राखेर अन्त्य हुने सुरक्षा थ्रेट के हो ? को हो त्यो सुरक्षा थ्रेट ?’

प्राकृतिक विपत्तिको समयमा सरकारको ध्यान अन्यत्र मोड्नका लागि जबरालाई पक्राउ गरिएको त होइन भन्ने प्रश्नसमेत दुलालले उठाए। विपत्तिबाट प्रभावित नागरिकलाई राहत र उद्धार दिनुपर्ने समयमा सरकारको ध्यान अन्य विषयमा केन्द्रित भएको उनको भनाइ थियो।

‘यो विपत्तीको समयमा जनतालाई राहत दिनुपर्ने काम गर्नुपर्नेमा सरकारको ध्यान अन्तै मोडिएकोप्रति म गम्भीर ध्यानाकर्षण गराउन चाहन्छु,’ उनले भने।

दुलालले जबरा पक्राउ प्रकरणले कानुनी शासनमाथि समेत प्रश्न उठाएको दाबी गरे। पक्राउ पुर्जी र स्पष्ट कारणबिनै व्यक्तिलाई नियन्त्रणमा लिने कार्यले देश कानुनी राज्यको बाटोमा अघि बढिरहेको छ कि अराजकतातर्फ जाँदैछ भन्ने प्रश्न खडा गरेको उनको भनाइ थियो।

उनले सरकारलाई पूर्वप्रधानन्यायाधीश तथा विशिष्ट व्यक्तिहरूलाई पक्राउ गर्ने र पछि छाड्ने कार्यको कारण जनतासामु स्पष्ट पार्न माग गरे। ‘के खाएपछि मध्यरातमा जोश आउँछ र मध्यान्ह होस आउँछ ? सरकारले जवाफ नेपाली जनतालाई दिनुपर्छ,’ उनले भने।

दुलालले देशलाई संवैधानिक र कानुनी बाटोबाट सञ्चालन गर्नुपर्नेमा जोड दिँदै सरकारको कार्यशैलीमा सुधार आवश्यक रहेको बताए।